打工致富嘅路已經唔通 - 方卓如

2015年9月22日 - 信報

一個有頭腦嘅大學畢業生，在2015年投身社會做事，比起我哋廿年前出道嘅，會有乜嘢分別？

人工可能分別唔大，而家比起廿年前，第一份工可能只係多兩千蚊。但係呢兩千蚊，廿年後嘅今日未夠你去睇場Madonna。廿年前出嚟做嘢，做三四年可以搬出嚟自己住，而家要等到結婚，兩份人工加埋先可以搬出嚟住。過去七年是租金火箭升空期，房屋租金個別可以升兩三倍，人工點會有兩三倍升幅？唔好話遲出世廿年，遲七年出道，世界已經唔同晒。

廿年前大把機會，你會覺得自己只會人工年年加，加到滿意為止。唔滿意，即走，魚唔過塘唔肥。今日，有腦嘅你知道機會唔係必然。可惜嘅係，唔係個個都有腦。

香港失業率奇低，世界艷羨水平，但係生活指數世界頂級水平，好多人已經跌落營營役役水平。有腦嘅大學生，如果睇得穿上一代打工致富嘅路已經唔通，夠膽出嚟博，用自己最叻最有興趣嘅本事搵食，佢仲有機會發達。

否則，一直打份工一心供斷層樓，恐怕捱唔到層樓供斷。

這代年輕人有條件去博

廿年前大學生走出嚟，其實唔夠而家啲後生仔咁好條件、咁多路數。廿年前，大學生真係出嚟賺錢畀家用，而家住埋食埋屋企，人工其實係零用。廿年前出過國留過學嘅，返到嚟英文都係麻麻地。而家放洋回來嘅，言行舉止係成個鬼仔，係真正識講英文，咯咯聲。佢哋冇即時負擔，要博要衝，起碼有五六年放膽去做。佢哋可以博中嘅成功機會大過廿年前。況且，廿年前嘅成功指標只有一個，就係搵到錢。

今日，後生仔起步已經唔窮，毋須要用搵錢嚟證明成功，大把唔用錢嘅指標去證明佢哋做得好，叻仔叻女。廿年前嘅大學生，唔會有呢啲視野同氣概。

每個年代都有新嘅發達方程式，只有嗰個年代嘅人先至見得到。而家嘅年代應該唔再係地產同股票，但至於係乜嘢，我希望呢代人有本事見得到。