慢牛依然係隻牛 - 方卓如

2015年5月5日 - 信報

帆船比賽其實仲辛苦過玩毅行者，48個鐘冇得瞓行山，在海上面一樣係幾十個鐘冇得瞓開船。山上面有乜嘢唔對路可以棄權走人；然而，大海茫茫，你想唔玩點都要捱到返埋岸先走得。你可以訓練自己行山行快啲，減少自己在山上面的痛苦時間；但海上面，唯一可以決定你要捱幾耐嘅，係風。喺海上面冇風，停喺度兩粒鐘經常發生。你能夠做嘅，喺烈日當空下，等。唔使講其他暈船浪食飯去廁所等等所有令你好唔自在嘅惡劣環境，帆船作為唯一一種被動式運動，比行山跑步更加可以刺激你反省思維。

唔只香港人關注中港股市慣咗行turbo大踏步往前走，鬼佬傳媒一樣見到呢次A股升一倍係一件異常事件。

《金融時報》專欄分析，A股由2014年1月開始向上升，同2005年9月開始升嘅走勢類似。如果走勢一樣的話，而家只係去到山腰，離爆煲玩完仲有好遠。

「阿爺」嘗甜頭未玩完

同上次唔同，今次上升有外資參與，來自四方八面的錢，可以將石頭推到上山頂，跌落嚟亦當然可以狠好多。

雖然上升得嘅終有一日會跌落嚟，但跌落嚟之前嘅上升時間，係可以長到你唔信。股市專收叻仔，但贏錢嘅通常係啲超級叻仔。超級叻仔知道自己其實同玩緊帆船無分別，好多嘢唔係你控制晒，咁多變數你亦知唔晒。有風可以行得快，個市就嘅，就放膽啲，去盡啲，但你唔會知風幾時會停。所以呢個世界冇賺盡，落到袋先係自己錢，最後贏幾多整定，同鬥船一樣。

呢次升市未完，「阿爺」啱啱先嘗到股市救經濟嘅甜頭，唔會咁快畀佢完。下一輪催化劑係A股加入環球指數，呢個目標未達到之前，狂牛只會變慢牛，但依然係隻牛。