死都救得翻生 - 方卓如

2015年2月5日 - 信報

投行高層好多時係律師背景，因為大部分工作係法律嘢，睇吓啲例有乜畀做有乜唔畀做。而家寫招股書都係律師包辦的工作，有咁嘅背景做投行，好正常。反而公司高層好多時候就係會計師背景，冇嘢比公司盤數靚仔更加緊要，而公司好多決定，都係以錢行頭，反而法律點講係其次，再搵律師拆掂佢都未遲。公司要諗數字行頭，會計功力大派用場，中外例子比比皆是。

同一盤數　改計法唔同晒

俄羅斯最大石油公司Rosneft，為了對抗油價下跌同盧布貶值兩大侵蝕盈利襲擊，宣布會用hedge accounting，令盈利數字冇咁難睇，仲可以有機會派到息。聽起嚟好似好勁，有個hedge字，感覺好似突然間有啲武器可以令輸到暈嘅公司賺番轉頭，仲有息派。說穿了，只不過盈利老早都是一個方程式計算出來的結果，並客觀存在。你改吓條方程式，自然有唔同嘅結果。當然，你要識得改方程式，都要有啲本事，所以咪話公司高層通常都有啲會計師背景，仲要係醒嗰隻，用同一隻雞，諗到唔整宮保雞丁呢啲cheap嘢，換碟金華玉樹雞收貴你一倍，咁咪值錢囉。至於點解hedge accounting可以救到Rosneft，你唔係會計師，冇辦法話到你知。

香港有冇例子？長和系重組，遷冊開曼群島，記唔記得官方答案話有乜好處？其中一樣係增加派息。你可能會問，同一間公司，同一盤生意，點解可以增加派息？就係可以，只要分派儲備定義唔同咗，計數時選擇計多啲入呢啲分派儲備，就可以派多啲息。記住，公司派唔派到息，首先唔係睇現金，係睇儲備㗎。你會問，唔通冇錢都可以派息？梗係得啦，借咪得囉。唔派錢派實物都得。但儲備唔夠，想派都唔得，呢啲又係會計嘢。所以話，唔係一定要喺投行先要用腦，你喺間公司坐到頂，用腦嘅機會仲多，仲值錢。