輸咗贏得更多 - 方卓如

2014年12月4日 - 信報

車路士喺聯賽目前為止未輸過，大家估佢哋會唔會不敗奪冠？摩連奴話，與其10場零比零打和不敗攞10分，倒不如大膽啲博贏，五勝五負攞15分仲好過。不敗嘅代價原來失分仲多，不如輸幾場反而攞多啲分。

識得好似摩連奴咁諗，就真係戰術大師。佢話畀大家知，輸咗可能贏得更多，不敗反而令你失分。聯賽係長途賽，要盡量攞分，每場都贏梗係最好；如果唔係，有贏有輸可能仲着數過場場不敗。

打和失分多冇着數

佔領運動可能一開始就注定冇得贏，如果爭取到真普選先叫贏嘅話；但係以攞分嚟講，開頭係攞足晒分，佔領是企喺一個高地，你睇「張融」開頭嘅時候消失咗就知。到而家攞分少咗，真普選攞唔到，絕食叫價仲低到只係求個對話機會，照計等於車仔輸咗波，士氣唔使講梗係低落，但如果有摩連奴嘅戰術頭腦，就知道就算今次輸都唔一定係壞事。

計呢個「聯賽榜」分數，佔領者總分應該依然領先政府，全靠之前旺角同金鐘出警棍扑濕啲後生仔，又減咗政府啲分。而家拉鋸狀態，零比零打和，對攞分冇着數。

所以啲老鬼摩連奴猛叫啲後生仔撤離，係有原因嘅，只不過啲後生仔係阿仙奴啲青年軍，邊鬼度識戰術，乜嘢叫做不敗失分仲多。

港股成交連日過千億，大市上上落落，只有大賭場港交所（00388）最受惠，其他升一隻跌兩隻，專家都玩死。今年接近收爐，應該係贏嘅多過輸，但係好嘢全部出晒，連「滬港通」嘅謎底都解開埋，年尾仲有全世界唔掂嘅事情擺在眼前，下年賺錢唔會有今年咁易。