諗吓後佔領時代 - 方卓如

2014年11月4日 - 信報

炒股票嘅人其實最啱搞政治，因為兩者都有唔少共通點。外國有好多成功例子，米高彭博係其中一個，索羅斯都有用錢涉足政治，Icahn直情以政治手法用爭取呈命賺錢，但香港就未出現過兩者兼容的高手，梗係有其原因。兩者有乜共通點？炒股票同搞政治，要成功，都必定要係聰明人，少啲腦筋，一係輸錢，一係輸命。香港炒股票都要腦筋，搞政治就唔使用腦喇，只要忠誠。你唔見好多議員蠢到加零一咩？點蠢法？佢自己都問緊自己。

炒股票同搞政治，都要無時無刻防人，以防被人陷害。呢兩行都係出名嘅零和遊戲，你賺我就蝕，一將功成萬骨枯，點都冇雙贏。你可以唔害人，但唔好俾人害你。當然，你唔害人，自然行慢一點。炒股要防止對手搵你笨賺你啲錢，搞政治要防人從中作梗奪權攞你命。

定性無法改變

香港人炒股票咁叻，應該知道一掂到政治，對家就會防你，估你別有用心。無論你出發點有幾好，動機有幾善良，對着打獵出身的人，老虎點會係朋友？

佔領人士咁善良，又掃地又煲湯，對於被指為顏色革命梗係莫名其妙。但係對於爭權是一生事業嘅人嚟講，你出聲要佢改呢改路，梗係會覺得你奪權，唔會見到你善良一面。佔領運動行咗成個月有多，呢種定性係冇辦法改變，你唔應該諗點樣去解釋，你應該諗喺後佔領時代應該點生活。

我覺得後佔領時代會生活得好鬼谷氣，仲慘過而家。有乜解救方法？惟有放眼世界，心胸廣闊啲，就冇咁谷氣。呢個世界衰政府多過好政府，唔公義嘅事情日日都有發生，香港唔係只此一家。

都係嗰句，你阻止唔到世界向某些人傾斜，但你可以爭取企喺傾斜嗰一邊，只要唔好欺負另一邊就得喇。