邊個係香港良心？ - 方卓如

2014年10月27日 - 信報

邊個先係香港良心？唔係陳老太，佢老人家去到咁盡，又去英國又去美國，佢嘅良心功能已經七七八八。冇理由一個茶餐廳老闆話佢唔用地溝油係有良心，要你多謝佢啩？應份㗎喎。陳太要講啲民主嘢，同唔用地溝油一樣，應份，唔叫得上良心。係要啲估佢唔到嘅人，講番啲人話，嗰種震撼力，咁先有良心效果，所以發哥寧願賺少啲都要講真話，其他個個唔介意同肥螳螂反面，等佢慢慢嘆私煙，咁咪良心囉。

田少講人話

真正嘅香港良心，唔使講，梗係田少啦！佢假假地都係有錢人，其他有錢人而家連唔出聲都畀人鬧，田少唔單止出聲，仲出聲叫嗰個人辭職，講咗好多建制人士心裏嘅說話出嚟。佢已經唔止一次，11年前都係靠佢先至過唔到二十三條，之後仲被罰，搞到佢選唔到議員。

而家風頭火勢，個個驚死擦鞋擦唔切，講真話？講少句、講慢啲都驚畀人記過，邊度敢講句真話？田少講得好啱，而家都唔係佔唔佔中，普唔普選嘅問題，呢啲咁千秋萬世嘅嘢，等得，但眼下香港真係無法管治。

外邊有人圍，入面同你流會，點搞？嗰個人辭職解決唔到問題，但佢辭職後可以叫人攜手坐低諗出解決問題嘅方法。其他人講呢啲說話都係吹吓水，但田少咁講係有代價，隨時滅黨都得。咁大壓力下，都敢講句人話，仲唔係香港良心？

佢未算最有錢嗰個，仲可以夠膽講句人話。有錢過佢多多聲嘅，無論個心幾討厭嗰個人，最多都係唔出聲幫口，頂多加多句叫你返屋企。

所以話，人哋話財務自由，有錢就可以有自由。但係去到某個位，有錢反而令你綁手綁腳，講說話都冇自由。

可以自由講真話嘅社會，唔係唾手可得。