打工嘅有一個特權 - 方卓如

2014年8月7日 - 信報

去上海有一個好處，鍛煉你嘅忍耐力同辦事能力。等幾個鐘頭機閒閒哋，喺等候期間盡量講電話、wechat、whatsapp、check電郵等等。搭上海機盡量唔好行李寄倉，萬一等等吓要轉搭第二架機，你都仲有機會等少幾個鐘。唔係話科技先進，可以節省人類工作時間，生產力提升咩？撘飛機返大陸最嘥時間，你要將晚上的約會取消晒，一日就浪費在呆等。

喺呢個時候，你就會領略到乜嘢叫做平等，同埋有錢都冇用嘅道理。同你一齊呆等嘅，有錢過你嘅又有，窮過你嘅又有，大家都冇嘢做到，除咗等。不過，張機票買得貴啲，總會等得舒服啲。

話頭醒尾易升職

做老細有一樣必備條件，就係要夠仔細。打工嘅有一個獨有權利，就係求其。打工仔有老細企喺後面，有乜事老細會搞掂。有嘢錯，老細會話番你知、會補鑊。

但老細背後，冇人。老細向後跌冇人會接住你，有嘢做錯冇人會話你知。所以做老細，冇得求其，睇少眼都死。你話係就係，唔可以聽夥計點講。佢哋未必識嘢多過你，講說話時又可能知啲唔知啲。你係老細，對自己冇信心，睇少眼，最後受苦嗰個就係你。

打工嘅要上位，其實非常容易，只要喺你老細未開聲嘅時候，已經做晒佢要你做嘅嘢，咁就有運行。老細最怕乜嘢？最怕煩。佢煩得愈少愈開心。你令佢唔煩，多咗時間諗啲正經嘢，攬住你嚟錫。當然，要做到唔使人出聲都識得做，要好高道行。

做啱同做錯，做得啱啱好定過咗籠，一線之差，但分別好大。所以，唔好羨慕人哋咁鬼高人工，亦唔好話人哋只係識擦鞋。老細要啲乜嘢夥計，佢熟過你。