Queen's Cube鬧「鬼」銷情差 - 紀曉風

2010年10月7日 - 信報

同人唔同命、同遮唔同柄係啱嘅。李超人個馬鞍山新盤天宇海，四日沽清一千一百多個單位；張標頭同陳佛爺合作在灣仔個新盤Queen's Cube，昨天首日開售，執筆之際，一共賣了兩個─係兩個單位咁多！

莫非香港市民忽然唔鍾意住灣仔、鍾意搬去馬鞍山？莫非南豐賣樓經驗不及長實？莫非香港呢幾日有沙士？莫非個股市突然冧咗？老紀諗來諗去，都冇法子諗到一個合乎常理的理由，去解釋呢個樓市大難題。

正在納悶之際，有個同事突然用遙控轉台，唔睇翡翠睇明珠；靈光一閃，馬上諗通晒──呢個盤之所以賣得唔好，真正原因唔係貴、唔係圖則差、唔係限制炒家入市、唔係揀樓要抽籤，而係改壞名。

香港特區都回歸咗十三年，政府大力推行母語教學，中國經濟實力已經超越日本成為世界二哥，大把鬼佬都以改番個中文名為時尚，好似西九個藝術家總裁Graham Sheffield咁有文化，都有個中文名叫「謝卓飛」，而市建局同南豐竟然在灣仔咁傳統的地區整粒Queen's Cube，啲街坊連讀都未必識讀，點買呀大佬？

老紀睇過咁多盤，印象之中，一般只有英文名嘅盤，通常都賣得唔好，可能特區同胞真係愈來愈愛國，對女皇開始冇咁有感情；但就算唔係呢個政治原因，都冇人想話畀人知自己住緊個間屋，好似粒「骰」咁細啩？

參考：

2010年10月7日 - 信報

QUEEN'S CUBE首天僅售2伙

市建局近年參與發展的新盤，多以豪宅形象包裝，推售呎價更非一般市民能負擔，該局與南豐聯手發展的灣仔QUEEN'S CUBE，在認購不足的情況下，昨天推售連加推72伙，正如市場預期一樣，銷情慘淡，全日僅售出2伙，成為近年新盤首天銷情最差的新盤，市建局更首遭「滑鐵盧」，有發展商直斥樓盤訂價太高；亦有學者表示，由於「嚴打」炒風，在未有投資者「撐場」下，令樓盤銷情強差人意。

市建局首遭「滑鐵盧」

灣仔QUEEN'S CUBE昨天下午3時在現樓進行揀樓，首一個鐘，現場只有地監局、市建局職員及地產代理進出，未見有準買家入內揀樓，情況為近年所罕見，甚至03年沙士疫症爆發，當年推售的新盤亦不致完全未見有準買家出現。部分地產商指出，由於南豐及市建局心頭過高，故此QUEEN'S CUBE銷情強差人意。

南豐集團晚上發出新聞稿，表示全日共售出2伙，其中包括31樓D室開放式單位，建築面積451方呎，以每方呎18370元售出，並表示首階段以登記抽籤形式認購，已達到公平、公開及高透明度的銷售安排，對後市具信心，將繼續吸引用家及投資者。市場消息指出，除31D室外，另外10樓以上中層A室亦告售出，按價單顯示，該單位面積582方呎，訂價948.2萬元，折合呎價16292元。

理大建築及房地產學系教授許智文表示，QUEEN'S CUBE由於受到政府及市建局賣樓指引所限，令樓盤缺乏投資者入市，而且單位訂價上偏高，樓盤「無水位」，連同《施政報告》等因素，令樓盤銷情受到拖累，相信或多或少會影響區內買家入市信心，但是次僅屬個別子，對大市氣氛影響不大。

QUEEN'S CUBE是次採用認購登記形式發售，但僅售出2伙，有協助樓盤銷售的代理指出，由於是次多個新盤搶先推售，部分原先入票之準買家，已轉軚購買其他新盤，個別仍有意入市之準買家，亦因為樓盤的負面消息而打「退堂鼓」，令昨天開售銷情雪上加霜，雖然發展商以呎價約1.5萬元推售，屬市場水平，但同等售價，卻可購入同區新落成，面積較大的單位，以致對於用家而言，吸引力驟降。