寧失千金，莫失寸土！中日最近因為釣魚島事件發生衝突，作為憤中一分子，愛國有責，於是便約了一班七十後吹水，準備聲討日本政府。東尼喜歡食魚生，便去了置地地庫那間Kiku。
飲咗啖清酒，清清喉嚨後，我便開始講：今次中日爭執，……話口未完，老鬼潘就話好在當年冇全情搞保釣，咁多年得個桔，乜都做唔到，而家經濟唔好，最緊要以和為貴，千萬唔好影響佢間廠出口到日本。
旁邊炒家韋就好激動，話咖仔好離譜玩嘢。我以為佢好有愛國心，原來最近佢唔信邪，係咁沽日本紙，升到八十三反揸，點知日本干預，急跌到八十六，被人摑咗兩巴，而家揸又唔係，沽又唔係，止蝕又唔甘心，搞到冇晚好瞓。靚女簡聽到呢度即刻加入話團，話以前一年去幾次東京逛街購物，而家日本紙咁貴，不如去歐洲扺玩些。
飲多兩杯，有少少㷫，便大聲問佢哋究竟有冇留意中日事件。上海石話當然知，佢講自己都有睇成龍大哥《新宿事件》同舒淇嘅《非誠勿擾》，重話後者好成功，而家大陸中產都流行去北海道自駕行。跟着又笑吟吟地講：對付日本政府好易，大陸咁多娛樂場所，大把日本客人，求其捉兩三個再同日本講數交換「人質」。
八十後保險區話不如租隻船去釣魚島。我精神一振，以為終於有知音人，但原來佢鍾意釣魚，以為個地方叫釣魚島，一定多魚釣。吳講師就笑阿區冇歷史地理常識，跟着就自言自語話保釣人士做秀，全中國數埋都唔夠一萬人示威，偏偏大大聲要去宣示主權，正一阿Ｑ精神。Rocky聽到即刻問講師是不是都有玩ＱＱ。
唔知係唔係件壽司太多wasabi，忍不住流下些淚水。
沒有留言:
發佈留言