2012年2月17日星期五

打流感針邊個着數 - 勞永樂

2011年10月11日 - YAHOO新聞

又開始有流感疫苗宣傳,政府又講,醫生組織又講。信唔信佢哋,就要睇市民肯打針對政府有咩利益,對醫生又有咩利益,然後睇埋對打咗針嘅人有益定無益。

政府買咗疫苗無人打,會被駡估計錯誤,浪費公帑;私家醫生同市民打針,有錢揾,打得多揾得多。醫生捧場宣傳疫苗,藥商賺大錢,投桃報李,請醫生飲飲食食,遊埠,贊助「學術」會議。呢啲咪利益囉!

所以,我要同大家推介COCHRANE協作網嘅《成年人注射流感疫苗成效》獨立評審,因為協作網信得過,唔收藥商錢,由有志確保學術公正嘅國際專家組成。

協作網將由1966年到2010年發表嘅40個流感疫苗成效臨床測試,進行綜合評審。40項測試合共涉及超過70,000名成年人。

結果: 

結論:
1、就算喺流感疫苗病毒同正在流行嘅流感病毒脗合嘅年度,要減少1個人患上流感,就須同33個人打疫苗。

以每個合資格嘅成年人打流感針,政府津貼130蚊計,同33個人打針嘅代價就係4,290蚊。呢筆錢係預防1個人患上流感嘅最起碼代價,仲未計交通費、私家醫生可能收嘅額外費用,同埋用咗嘅時間添。

2、如果撞啱疫苗病毒同正在流行嘅流感病毒唔脗合嘅年度,要減少1個人患上流感,就須要同100個人打疫苗。用樓上嘅計法,預防1個人患上流感,最起碼嘅代價就係13,000蚊。 

精打細算嘅讀者,預防一個人患流感最起碼要使4,290到13,000蚊,你話係平定係貴呢?而且,唔好忘記,在最多人病嘅年度,就算無人打疫苗,每100個人之中,都只係得4個患上流感;呢幾個人之中,絕大多數唔使睇醫生、唔使食藥就好,醫藥費一毫子都唔使!你話啲醫生猛叫人打流感疫苗,老實定唔老實呢?

綜合評審又發現:
1、注射流感疫苗無減低流感病人嘅入院率,又無減低出現流感併發症機會,即係話流感疫苗對預防嚴重流感無料到!

2、每注射100萬劑流感疫苗,就平均有1.6人出現「吉巴二氏綜合症」呢種嚴重不良反應,輕則令人短暫痲痺,重則致人於死。

警告:
COCHRANE協作網指出,上述認真麻麻嘅流感疫苗成效,可能已經係高估咗。因為被評審嘅40個臨床測試中,竟然有15個係藥商出錢做嘅,另外有4個無申報有無收過藥商錢。

睇完呢篇文章,震驚嗎?所以,唔該諗清諗楚先至去打針,咪以為有政府津貼,啲針就打得唔好嘥。最後益你嘅金句係:盡信醫藥,不如無醫無藥!

資料來源:
http://www2.cochrane.org/reviews/en/ab001269.html

沒有留言:

發佈留言