又貴又用唔着 - 方卓如

2016年11月1日 - 信報

LV之前用7億美金買入Rimowa八成股權，希望佢可以改良這個德國名牌嘅產品質量。由法國牌子改良德國品質，聽落非常詭異，通常掉轉先合邏輯，但係我買嘅頂級鋁喼，用咗3次就已經俾機場員工掟到爛咗，失去功能。類似案例從未發生在以往幾舊水黑色布料笨喼身上。而家機場見到愈來愈多人用類似款式嘅喼，已經唔算特別。用3次就失去功能，相信顧客需要思考點解要買一個仲貴過裏面旅行用品總和嘅喼。

又貴又用唔着嘅仲包括買樓。點解新樓咁好賣？因為你根本買唔到二手樓，只可以從新樓去入手。

辣招唔只壓低了需求，更壓低了供應，肯賣樓嘅都係揸咗多年先會賣。揸咗多年，坐貨能力受得起考驗，唔會輕易割價賣樓。

買二手樓，按揭成數有限，借錢數量有掣肘，提價空間不大，二手樓十居其九超出預算。買樓嘅慾望唔會因為辣招而減退，反而人類天性弱點，愈唔畀做愈想做，愈唔畀買愈要買。香港掌握最多資訊嘅就係地產商，最有預測能力嘅又係佢哋。佢哋要建造一層你可以負擔嘅樓，賺得最豐厚嘅利潤，好難賣一間理想居所過你。

懂掌握時間先係King

你而家去買樓，預咗一定係又貴又唔啱使。你都要買，就好似買一個Rimowa嘅喼一樣，買嗰陣時開心，用嗰陣時就激氣。

過往都係股市爆完先到樓市。好耐冇聽人講話要買股票，全部閒錢都走去買樓。股市失去活力，冇咗支持，想唔跌都難。

股市跌完，就到樓市，殺埋一批逃離股市嘅資金。就係一個又一個嘅循環，市民嘅錢就一次又一次集中在少數掌握資訊嘅人手中。Cash未必係King，要懂得適當時候留Cash適當時候用Cash先係King，時間掌握唔好，有Cash仲害咗你。