世界標準係冇標準 - 方卓如

2016年4月8日 - 信報

「方帥，又到星期五，講啲故仔聽吓，等我哋做細嘅學吓嘢吖。」「千祈唔好咁講，我都係細，我都學緊嘢。學乜嘢？呢個世界你唔可以照搬人哋嗰套，否則好易瓜柴。例如《巴拿馬文件》，全世界領袖無一幸免，但係結果就好唔同。冰島總理都唔使計你買嗰啲債券係賺定蝕，有間離岸公司同你有關係，即刻要辭職。好多人話，吓，咁快手？咁5000萬呢？細佬，世界標準唔係咁統一，人哋戇居頂唔住壓力，我哋唔一定要學。中國領袖都有離岸公司嘅轇轕，反而唔會好似5000萬咁乜事都冇，只係放喺快勞，將來慢慢再用。」

「咁有乜嘢啟示呀方帥？」

「識得唔好亂咁用世界標準，你就走少好多冤枉路，輸少好多錢，況且而家都冇乜世界標準可言。日本負利率，日圓反而升到砰砰聲。你想撳低日圓救經濟，佢反而升，你仲唔死？你咁好學，睇咁多書，又熟悉歷史發展，以為將來世界係同你以往所見嘅同樣運行？輕則輸到你傾家蕩產，重則小命不保。明白世界標準係冇標準，你思想鬆綁，咁先有運行。」

思想鬆綁　先有運行

「我副身家咁細，幾時輪到我傾家蕩產？有排。」「草蜢仔，你又唔好妄自菲薄，做金融呢行，決勝負嘅唔係你有幾多身家，係你有冇腦，同埋你聞唔聞到有錢，仲緊要。有人話金融呢行都冇create value，唔值得攞咁多錢。其實你諗吓，你做緊嘅嘢，就係將啲散修修嘅拼埋，用你嘅腦筋、人脈、技術、嘴頭，一次過將啲唔啦更，冇人覺得有可能嘅， 猶如街上執啲零件砌成一部車，咁仲唔係create value？停留喺工廠式要件實物先為之value，咁你就注定維持喺工廠嘅水平。你今日冇，唔代表將來唔會有，將來就係下一秒啦。」

「方帥，唔怪得你幾廿歲人個樣仲咁後生，思想原來咁另類，諗嘢果然係同啲𡃁仔差唔多，只可以稱呼你為monosistō，單一意志。」