2016年2月18日星期四

廿一世紀走難 - 方卓如

2016年2月17日 - 信報

岸信介在本欄出現過幾次,介紹過他致富之道。佢在淡市中依然搵到食,財富並未縮水,真神人也。最近佢搞嘅新動作,就係疊埋心水走佬,移師另一個國家。但係佢同唔少心淡嘅人一樣,起晒錨走人唔划算,始終喺香港先可以有搞作、搵到錢。

唔到你唔信,歷史的確係循環。30年前有一大批人走過,佢哋走咗,造就好多上位機會畀下一代,冇得走嘅反而一個二個發晒達,佢哋嗰啲走咗嘅舊老細,喺外國搣吓搣吓,雖然疏肝,但係窮過佢哋啲舊伙記。

搵錢唔受地域限制

今時今日,到呢啲坐咗舊老細個位嘅變成新一代舊老細,開始搵到咁上下,想走。佢哋有部分係細細個就畀老竇踢咗去外國讀書,畢業後自己返嚟搵工,做到差唔多,錢搵到啲,而家可以返歸,同老竇老母團聚。同佢哋啲舊老細唔同,舊老細走咗去等於退休,唔使再做,但而家新一代嘅舊老細,走咗,未退得休,仲想做。問題係,全世界都冇嘢可以畀你做。赫然發覺,自己嘅價值原來走唔出鯉魚門,同耕田冇分別,靠塊地生存。岸信介煩緊嘅係,點樣可以走咗都可以繼續喺呢度搵錢。

全世界咁大,要搵處地方落腳,除非你係年輕人,乜都冇,由頭開始。否則的話,你好難搵到處樂土。活到岸信介咁上下年紀,應該知道,邊處落腳,自古以嚟,都係講搵唔搵到食,同有冇自己人。冇人冇物,搵到食嘅,自然可以慢慢建立基業;搵唔到食,但係有自己人,慳慳地過人世,有自己人相陪,都可以接受。冇錢又冇人,除非走難,否則點會起錨?岸信介有一個搵錢網絡咁堅實,都諗住連根拔起,去一個搵唔到食兼冇自己人嘅國度,原來有錢嘅都有富貴嘅走難方法。

每一代都有人走有人留,好閒。但廿一世紀走難,可以走得型啲。搵一門手藝學問,令你可以隔空搵食,遙控賺錢。財富增值唔受你嘅地域限制,咁先係真正嘅自由人。廿一世紀其實無乜邊處係樂土,一個地獄搬去另一個地獄,只係受苦嘅形式唔同咗。

搵到自己嘅生存價值,知道自己要乜嘢,忠於自己,勇於生活,你喺邊都係一樣。

沒有留言:

發佈留言