人人打字變文盲 - 方卓如

2016年2月15日 - 信報

簡體字成為最近家長聞風喪膽嘅戰場，佢哋嘅擔心係好正常，只不過唔記得咗，令佢哋嘅仔女變成文盲嘅，頭號敵人係手機同平板電腦。

相信不出5年，連學生都唔使用筆寫字，全部用輸入法，撳兩個制就可以成個字打出嚟。用簡体，表示輸入嘅時候用拼音，個字點讀先係重要，點寫反而冇人識。到時候，莫講話學生係文盲，我哋依賴手機平板嘅，都係文盲，太深嘅字，只會記得讀音或頭兩筆，要完整寫個「壽」字都未必得。

文字係媒介，內容先係主體，幾多人真係日日去讀詩詞歌賦，睇《蘭亭序》去欣賞繁體字嘅優美？你應該擔心，將來所有中文字寫嘅內容都係假嘅，不盡不實，隱惡揚善。

你嘅仔女，再唔可以通過文字接收正確訊息。佢哋日日睇嘅，回家你都要同佢哋消毒，從頭灌輸正確觀念。飲砒霜，無論用水沖定用茶溝，同樣死人，但你唔會爭取用茶，保存中國千年文化歷史，而反對用水呢啲低下層先會用於保命嘅飲品。就算你位公子識睇繁體字，亦唔代表佢會月讀30本書，增進中國文化。

今時今日嘅家長仲辛苦過年輕人，全世界冇一個地方連文字都要保護，亦唔見得邊處嘅家長，管教到分得咁細，連文字都要憂心。