股市拉動經濟 - 方卓如

2015年4月21日 - 信報

林少陽幾時都係大師級，我聽佢講未輸過。佢話遲早過三萬二，你唔信就贏少好多。佢話呢個市況毫無技術可言，全對，只係睇你夠唔夠膽，同有冇耐性。佢話中國而家靠股市救經濟，呢句就真係語重心長。

股市救經濟呢一招，係美國佬用先。2008/09年生靈塗炭，美國大印銀紙，目的係避免大蕭條，經濟會唔會有起色已經唔係當時可以預見。一輪唔夠，第二輪；第二輪唔夠，第三輪。

前後出了三次QE，經濟反應唔直接，但股市就即時有反應。之後發覺，原來唔係經濟影響股市，反而係股市拉動經濟，股市好令到經濟數據有起色。呢招反過來先炒股市再搞經濟，畀全世界見到，所以連日本同歐盟照跟，印銀紙，股市上升，再等財富效應帶動經濟。

中國印銀紙其實狼過美國，但銀紙一開始唔係流向股市，落咗一啲有權勢嘅人手上，無論係個人定係有背景嘅企業。

狂牛唔會咁快完

結果係通街法拉利，屋企有幾億現金。經銀行走入企業嘅錢，要還。借完錢賺唔夠，還唔到錢，對兩家都冇利。

炒股票唔同。股票炒起，公司集到錢，唔使還。市旺，股民賺到，冇投訴。炒爆咗，市冧，錢入了強者之手，洗完牌又嚟過。印咗出嚟嘅錢係唔會消失，只不過唔知佢收埋喺櫃底定係放出嚟流動。股市暢旺，係最能夠吸引床下底資金出籠嘅招數。

如果知道股市係用嚟救經濟，就會相信今次股市狂牛唔會咁快完，亦唔會二萬八就玩完。

香港提供一個狂炒嘅平台，又唔驚爆煲影響13億人生計，可以集合世界各地資金，香港人記住唔好妄自菲薄，你哋打出嚟嘅基業，對國家依然有貢獻。