最緊要execution - 方卓如

2015年3月20日 - 信報

我寫稿好快，但諗寫乜就好耐，所以經常遲交稿。寫過嘅唔想再寫，唔識寫嘅又冇得我寫，寫咗咁多年，唔重複嘅話，點搵咁多嘢寫？作歌嘅重厲害，世界經歷咁多年，積落咁多歌，音符數量少過文字，重有幾多未出現過嘅組合？歌就算唔重複，熟口熟面嘅你都聽唔少。

有冇聽過Blurred Lines呢隻歌？聽吓，你可能會有印象，或者你去蒲嘅時候有聽過，唔知名啫。呢隻歌而家再度爆紅，唔係因為好聽，係因為佢累Pharrell Williams俾人告，話佢抄Marvin Gaye隻Got to give it up，要賠七百幾萬美元。

你有機會聽吓，兩隻歌完全唔同，唱法差唔多，感覺差唔多，但你絕對唔會撈亂。成隻歌唔同，個mood似，都變成抄襲，要賠。

抄襲喺商業世界，普遍到暈。唔使聰明過你，只要做得快過你，賣得多過你，就贏。贏咗，就有錢打官司。好嘅意念大家都有，通常都差唔多。所以意念唔值錢，實行得好嘅意念先值錢。

股票世界唔好有創意

喺股票嘅世界，抄襲就完全冇問題，係真正注重execution，唔使點用創意嘅行業。唔單止唔使點用，最好係冇乜創意，因為你嘅創意，即係冇先例，反而會過唔到監管機構，到頭來做唔成居多。千萬唔好　爆頭諗新橋，你用啲聰明才智，諗吓點樣做得更好、更漂亮，咁你就贏晒。最勤力嗰班，晨早起身睇晒啲announcement，睇吓人哋做啲乜嘢。睇得多，熟咗，識做，度好啲架生，咁就可以。唔好睇少execution，佢要用到嘅創意，可能仲考人。呢行最啱就係嗰啲心思細密嘅人，諗嘢諗得全面啲，睇多兩三步，你就會做得好過人。

Pharrell Williams 如果喺香港出世，咁就唔使俾人告，因為佢就算抄，都唔會有人發現，反正所有歌都係差唔多。