唔係嗰種遷冊 - 方卓如

2015年1月12日 - 信報

全世界都在分析長和系重組，公關部門忙於收集坊間的評論分析，管理層又要向上下左右解畫，標準答案全世界都聽過好多次。問題係，真正目的是否包括在內。

重組其實包含了三個動作，上市公司變成了開曼群島公司，和黃（00013）併入了長和，地產業務分拆上市。重組後結果，李氏每間公司的控股只有三成，沒有了上市公司控制上市公司的架構，有一間純地產公司。三個動作加三個結果，邊樣先係真正目的？

長實跟怡和不同

好簡單啫，真正目的梗係講得最少嗰樣，邊樣嘢講得最少，嗰樣就係真正目的。全世界都望住話遷冊，呢頂帽的確係幾煩，會被有心人大做文章，要向人交代解畫，的確係煩，但絕冇難度。香港仲有邊間公司上市係用香港公司？生意喺香港，上市前冇幾耐都會整間開曼群島公司上市，已成慣例。只有老牌本地上市公司，幾十年前仲用香港公司上市。任何呢類公司搞上市，都一定會用間新嘅開曼群島公司搞，只不過今次間公司係首富嘅，先會咁多眼球望住「遷冊」呢兩個字。其他人？唔會有人為意。遷冊呢條罪名，同當年怡和完全不可同日而語。怡和唔單止唔要香港註冊公司，仲唔要喺香港上市，亦唔再大搞香港生意。後兩者先至係身體力行撤離香港，純粹間公司唔喺香港註冊，但成份身家喺呢度，就等於攞住美國護照住咗喺敍利亞，你估本護照可以保你唔俾人斬頭咩？

公司解釋得好好，要簡單嘅，全部大陸公司，除了H股之外，都係開曼群島之類的海外公司，佢哋唔愛國咩？佢哋生意撤離中國咩？講得技術啲嘅，香港公司令佢哋唔夠儲備做分拆，要用間開曼群島公司，人哋法例要求的確唔同。在情在理，唔係怡和式遷冊。真正目的，時間關係，明天繼續。