完全見到相反 - 方卓如

2014年11月6日 - 信報

美國中期選舉共和黨贏晒，奧巴馬變成票房毒藥，同六年前完全唔同。政客選舉時講到天下無敵，做就有心無力，差唔多變成常識，放諸四海皆準。選舉時用明星表現爭取選票，贏咗變成真做就要另一套技能。唔好以為咁就代表民主唔好，就算選咗出嚟嘅政客有幾不濟，選民都可以放心政客唔敢做啲損害佢哋利益嘅嘢，因為政客仲要靠討好選民而生存，雖然唔排除政客能力有限，一事無成。

深思「通車」益邊個

香港奇就奇在有機會用選票選咗個損害香港人利益嘅人，因為選票唔能夠對付出賣港人利益嘅政客。一句到尾，而家咁多香港人抗拒「袋住先」，就係因為選票保護唔到佢哋嘅利益。

財爺話「滬港通」準備好，隨時開得。其實唔少評論都講咗究竟「滬港通」對邊個着數啲。而家內地人可以嚟香港開戶口買股票，但係香港人唔可以返大陸開戶口買股票，咁即係「滬港通」方便買港股定A股？究竟邊個想開通多啲？只不過阿爺益我哋嘅形象被政府吹到無限擴大，隨時打個乞嗤都係益香港，所以「滬港通」唔開就係罰你，你乖就開嚟益你。但係吹吹吓呢招已經唔work，好快香港人就睇到益得你耐，遲早要還，家吓經已開始還緊喇。

上市公司要買一件蝕錢嘅公司，你估主導嘅係上市公司定係蝕錢公司？識唔識答？如果你知道真正答案，就代表你真正識炒股票喇。而家股票市場最厲害嘅人係你搵唔到個名嗰啲，可以做到咁嘅地步，唔係淨係有錢就得，仲要有一個好勁嘅人際網絡。可以做到咁嘅境界，就真係可以㩒機咁㩒。蝕錢公司肯賣，其實都唔係好事，反而代表老細唔想再玩。不過，市場見到嘅係完全相反。咁先好，有人見到相反，咁先有得炒股票嘛。