唔畀你有香港良心 - 方卓如

2014年10月30日 - 信報

我一早都話，香港良心講出真話，講出好多建制人士心底話，係有代價㗎啦，所以佢絕對稱得上香港良心。我諗佢都勢估唔到，代價嚟得咁快咁猛，頂多咪下次選舉唔畀票佢，點知原來會畀人炒魷魚。

唔好以為咁樣係幫咗嗰個人，等佢有金剛護體冇人敢鬧佢。相反，以後冇人敢開口撐佢至真。你試諗吓，建制派如果開口護佢，實畀人話佢怕死之嘛，講啲嘢唔荒係真。出嚟講嘢嗰個，會畀人一個奴才形象，有身份有頭有面嘅建制，點肯同你癲，臨尾幾年衰喺你手上？從今之後，講真話又死，唔講嘢都死，建制呢條路仲難走過泛民。

以前啲人話溫水煮蛙，其實諗諗吓，如果隻蛙老早畀人捉咗，反正遲早都要死，溫水煮真係好過猛火蒸。你諗吓，如果溫水溫得夠耐，隻蛙喺溫水游足50年，分分鐘百年歸老嗰陣都未煮熟，咁你就冇投訴啦，隨時喺溫水仲嘆過你喺出面游。

溫水煮蛙買時間諗計

再且，或者溫溫吓，捉你嗰個已經食飽咗，熄火，唔使再煮你呢。甚至乎，溫溫吓，趁佢唔為意，跳走咗都未定。溫水煮蛙，就係畀你買時間，橫死掂死，有時間仲可以睇吓有冇生機。

香港喺好多方面本來行先過內地，但人哋夠大、學得夠快，唔單止好多嘢已經超越香港，連世界都超越埋。而家香港人想要嘅嘢，今日攞唔到，唔代表他日冇。

如果真係冇，唔係你唔叻，唔係你唔堅持，係客觀環境唔容許你用呢個方法去攞。溫水煮蛙個名雖然難聽，但代表你仲有時間去諗計。如果扭去猛火，咁就連時間都爭取唔到。

科技嘅嘢，有時信唔過。本文本應還有300幾字，但喺iPhone上面突然消失咗，好邪！冇咗嘅字，我寫唔番出嚟。

這300字係講佔中，唔係高科技到咁卦，大佬？