一個朝早清晒 - 方卓如

2014年10月15日 - 信報

香港變咗泰國一樣，人哋有紅衫軍黃衫軍，我哋就有黃絲帶藍絲帶，呢條裂痕係永遠補唔番，因為真係價值觀唔一樣。

唔可以簡單地話藍絲帶就一定係收咗錢出賣靈魂，又或者係為了個人經濟利益就埋沒良心，佢哋當中亦不乏讀過書，唔係因為錢，而係真心相信一套佢哋認為啱嘅社會運作方式。撐學生嘅人唔會明白佢哋點諗，正如佢哋亦唔會明白啲學生搞咁多花臣爭取一啲攞唔到嘅嘢為乜。呢個世界已經唔需要用理據辯論說服別人，根本冇可能，只可以鬥大聲不停講自己嗰套。

講道理都無用

同樣道理，你覺得中央睇唔到你諗緊嘅嘢，唔明白你，誤解你，你亦都唔使諗住可以理性講贏佢，因為大家諗嘢嘅角度高度唔同。你諗緊點樣對香港好，佢會諗香港點樣好係對國家最好。你諗緊香港範圍之內乜嘢叫合理，佢諗緊香港喺成個中國範圍內乜嘢叫做合理。

香港人過了幾十年風平浪靜舒服寫意嘅生活，中國過去幾十年由冇到有，各級官員每日要諗要防要應對的事情日日新鮮，你永遠唔可以想像佢點解會咁樣諗你。

外國勢力，顏色革命，你覺得匪夷所思，邊有可能嘅事情，佢話你係，你冇辦法用任何理性對話說服佢，包括公開信。悲唔悲哀？

政府唔肯正面處理今次佔領運動，不斷鞏固憤怒市民嘅憤怒，唯一可以繼續管治呢個城市嘅方法，就係換走晒批憤怒嘅市民。正如清理路障一樣，清理阻頭阻勢的憤怒市民。

香港要繼續運作，唔一定要靠香港人，金融界已經率先換血，唔再由香港人把持（又或者從未試過）。仍然是由香港人主持大局的，是中層勞動力同政府機關。如果要換血方便管治，一樣可以。香港人無處容身，先係今次佔領運動最根本原因，而且會因佔領運動進一步惡化。

警察要清除路障，一個朝早搞掂。究竟封路成個星期，又有口罩人出手清路障，係自然現象定係別有用心？你明白點解香港人咁鬼憤怒，連西裝友都要幫手搭棚。