最弊個個都識諗 - 方卓如

2014年6月23日 - 信報

過去50年最大的洗腦係市盈率，靠佢嚟買股票，一係輸死你，一係走寶激死你，結果都係死。冇辦法，鬼叫你畀人洗腦，抵死。唔信？有例子。Amazon作為史上最大的網上零售商，上星期五的市盈率是540倍。你冇睇錯，係500幾倍。作為聰明人，識得做功課，又識計那些乜率物率，一定會覺得Amazon太貴，唔抵買。如果放在香港，直情係那些垃圾七八九線股，掂都唔好掂。

但實情係，過去5年Amazon股價長升長有，期間唔單止市盈率幾百倍，蝕錢都試過。而買Amazon股票的人，係比你更識計數的基金經理。點解你咁醒，知道要避開呢啲幾百倍市盈率嘅垃圾股，反而那些日日買股票搵食的專家撲埋去荒死買得遲？

買股票不止靠市盈率

市值千幾億美元的Amazon，一年賺得兩億幾美元，但同年卻有50幾億現金落袋。Amazon出糧出股票，員工賺的毋須公司負責，由股東埋單，醒到爆。市盈率反映不到Amazon賺了多少資源，一個盈利數字無法表達公司有幾厲害。幾百倍市盈率都肯撲埋去買股票，唔係話買佢前景咁簡單，而係公司有一定的資源在手，正持續賺取更多資源，而這實力是持續表現，並非曇花一現。

「經濟學人」今期講Amazon可以有幾勁，要睇穿一間公司值幾錢，坐喺冷氣房、上吓網、揭兩揭，係冇可能有新發現。你畀人洗腦洗到以為撳吓計算機、計吓數就識得分辨公司龍與鳳，作為課餘活動冇問題，諗住發達，同睇完西甲重槌買西班牙捧盃冇分別。

「經濟學人」都有講6.22投票。香港係國際城市嘛，又係國際金融中心，梗係會引起國際注意。香港最大問題喺邊度？就係好多人都識諗，個個都有自己一套諗法，冇人認為自己錯。一邊就話對方收咗美國佬錢，一邊又話對面收咗阿爺着數。唔同以前打仗，漢奸知道自己做緊漢奸，黑白分明，漢奸都知自己做緊乜。亦唔同打世界盃，大家知道各為其主，無仇無怨，踢完仲可以握手攬頭攬頸。當個個都覺得自己係正義，對家才是壞人，大纜扯唔埋，根本冇得傾。搞落去，你得兩條路，是但揀一邊企，或者閂埋門當聽唔到。