滙豐故事 - 左丁山

2010年09月20日 - 蘋果

滙豐銀行主席葛霖不知何故，接受保守黨自由民主黨聯合政府嘅邀請，加入英國政府做一個並無多大實權與影響力嘅Minister of State for Trade and Investment（貿易與投資國務大臣），呢個職位只算係英國大Sales，官階唔算好高。當然葛霖不為金錢，做官有幾多人工吖，而且佢會將年薪捐出做慈善㖭。呢位牛津學士、MIT碩士初出道時就係加入英國政府做公務員嘅，係「海外發展部」嘅公僕，後來入MIT，畢業後做麥肯錫，一九八二年來港加入滙豐做企業策劃（corporate planning）。滙豐傳統係招收蘇格蘭文法中學畢業生做見習生，在香港受訓之後就派往全世界分行累積經驗，有能者最終成為大班，沈弼、浦偉士、龐約翰皆屬此類。七十年代後期，滙豐決定追上時代，從ITT聘請咗一位Bernard Asher做總經理，負責策略規劃（strategic and corporate planning），從後來發生嘅事情可以推論，呢位Asher先生係負責策劃滙豐如何設立三腳櫈，到英國收購Royal Bank of Scotland（失敗咗），在美國收購Marine Midland（後來成功咗），為應付香港九七問題而做定戰略性部署嘅。一九八二年葛霖加入滙豐，就係與鄭海泉一齊為「企業策劃」做工作。

而今葛霖大抵做到夠晒皮咯，家做銀行家嘅壓力太大，索性提早退休，重執故業，義務為祖國效勞。邊位接棒呢？好多人話會係非執董John Thornton，但龐約翰時期嘅行政總裁韋志誠就話應該由滙豐人接任，保持滙豐傳統。以往滙豐大班退休前已經知道邊位接班，現在就連葛霖宣佈要走嘞，都未知道誰是下一任，世界真係變咗咯。

滙豐有百幾年歷史，自有其內在文化，與別不同。前滙豐中國業務總裁，現中國民生銀行行長王浵世出版咗一本新書《香港．上海．滙豐故事》（商務出版），基本上係賓架王之滙豐傳記，有鄭海泉寫序言。賓架王係1972年中大崇基畢業生，自稱崇基仔，1973年滙豐請本地大學生，佢走去應徵，順利入行，佢話考試之時，左邊係港大仔，右邊係新亞仔，佢呢位崇基仔覺得不是味兒，點知咁就入咗滙豐，成就一生銀行事業，想知道滙豐故事，王浵世嘅銀行生涯有啟發性。