白武士定黑武士 - 方卓如

2016年2月16日 - 信報

最新一集《星球大戰》成為美國票房最收得嘅電影，預計會同時成為全球最收得，肯定勁過《美人魚》。呢一集《星戰》照抄1977年第一集，故事脈絡一模一樣，焦點都係黑武士。然而在現實生活，股票市場，反而你冇咁易分得清黑武士定白武士。

股票號碼令人聯想起遭受恐怖襲擊嘅恒發洋參（00911），早前相信被襲擊，股價狂跌九成，傳聞被人斬倉，殼都輸埋。昨日有新發展，公司以一仙大比例發股，新股東將用2.8億元成為持有近六成股權嘅大股東。換言之，上市公司控股權轉畀第三者，斬倉奪殼嘅，未能得逞。

一仙攞股票未必係老友

今時今日，如果你仲係看字面公告人哋講乜你聽乜嘅心態去了解事情，唔該你放低報紙，唔好浪費時間。你只適宜繼續睇無綫電視同用手機打遊戲，反正你都無能力去看見社會真面目。踏入猴年，你應該醒覺，世界並唔係你看到嘅表面運作，真相永遠在你看不見的水底。

一仙攞你股票嘅，究竟係白武士定黑武士？係老友定對手？能夠用一仙攞股票嘅，應該係老友，否則邊會肯賤價賣股票畀你？但係用2.8億攞到近六成控股權，只不過係用較低市價買一隻殼，未必稱得上老友。2.8億全數入公司，原大股東斗零冇落袋，咁蝕底，應該只會益老友。但係賣殼嘅花款同孫悟空一樣，七十二變，冇錢落袋唔代表冇着數，對象唔一定係老友。狂印股票似乎令奪殼計劃未能得逞，肯出錢幫拖嘅，應該係老友。但係你唔知以前大股東用股票借錢是如何借法，印股票可能只係還債方法之一。講咁耐，結論係，睇唔出印股票係反擊定投降。

睇唔出好正常啫，而家呢個世界黑白倒轉，讀過書嘅似爛仔，冇讀過書嘅做土豪，你都唔知叫個仔讀書好定唔讀書好，將來讀書仲要擔心佢學啲乜嘢字，一係繁，唔係就煩。唯一可以肯定嘅係，本來應該有錢嘅人，而家都變成好窮，底褲都攞出嚟當埋。有錢人變窮人，呢啲場合，通常係金融危機爆發先會出現。

你可能要擔心， 自己仲有冇錢搵人幫個仔補習中文。