負利率唔一定負回報 - 方卓如

2016年6月7日 - 信報

Warriors同Thunder打嘅7場波原來已經係冠軍戰，你見到LeBron James隊波完全唔夠打，垂頭喪氣。Curry都唔使用力，由得其他人甚至副選落場打都夠贏。打波同做人一樣，以逸待勞，過早一帆風順未必係好事。艱苦拚搏，釜底抽薪，出過九牛二虎之力，先可以笑到最後。

Warriors一定係今屆總冠軍，只欠能否連贏三屆成為Warriors王朝。

說好的大爆煲仲未出現，但係你相信，大爆煲遲早發生，世界經濟係無可能無風無浪直線上升。雖然你估中終有一日爆煲生靈塗炭，但係唔代表你而家就要落注買爆煲。須知道爆煲與未爆煲之間，係可以有一段好長嘅距離。喺呢段距離入面，你每日都係錯，雖然最後一日你係啱，但你未必可以守到啱呢一日。而家最痛苦嘅係，最終睇得啱嘅人每日都受緊做錯嘅懲罰。

國債爭住要　市場信心低

點知道大爆煲嘅日子係愈嚟愈近？全世界負利率嘅國債已經突破10萬億美元，唔好以為負利率國債都肯買嘅一定係蠢材，剛剛相反，佢哋先至係醒到爆嘅聰明錢。負利率唔等於負回報率，德國同日本國債係負利率，但係年頭到而家回報率都超過4%。代表乜嘢？代表愈嚟愈多人願意買負利率嘅國債，爭住要。

你今日買咗到期日要輸錢嘅國債，明日有人畀你賺去接你手上的蝕本貨。

咁嘅場面，證明市面上冇乜嘢好買。買咗，隨時蝕得多過負利率嘅國債，最大恐懼係渣都冇，血本無歸。負利率嘅國債，你揸到尾都只係輸0.1個百分點，點都安全過買任何令你血本無歸嘅產品。負利率嘅國債愈多，證明愈多人高價搶蝕本貨，對市場嘅信心愈低。

都係嗰句，太早估啱仲衰過估錯，你信心唔夠，恐慌，唔做嘢嘅處境好過你亂做嘢。