自然定律千古不變 - 方卓如

2016年4月20日 - 信報

而家個個都話要攞1469牌，位位都變成金融才俊。金融才俊泛濫嘅年代，究竟仲有冇金融才俊？

金融才俊首先要搵到錢，搵唔到錢嘅金融才俊，你愛？金融才俊至少要有個款，個殼唔可以太差。

梳一個西門吹雪頭，身高唔夠搭飛機捧行李上行李架，眼鏡厚度能夠擋子彈，就算你搵到錢都好難稱呼你做才俊。

金融才俊除咗搵到錢有個款，最後都要有種生活方式，咁先至成個package出咗嚟，有立體感。如才俊餐餐都走去食碗雲吞麵，唔識去最佳餐廳，食完返屋企打完機後臨瞓前再單手上網打機，咁又真係好難叫你做才俊。

金融才俊出S版

十幾年嚟不斷由傳媒塑造嘅金融才俊，自自然然喺港人腦海有個原型，一講呢四個字就有個形象浮現出嚟。

1469牌成行成市之後，金融才俊好似iPhone同波子一樣，出咗個S版。金融才俊S，同上一代金融才俊唔同，S版好少打工，自由人。打份「高敏」嘅工，卡片好威水，辦公室好鬼靚，但係由返工受氣受到放工，放工後仲要電郵WhatsApp蹂躪你，對人歡笑背人愁，生涯同最古老行業差唔多。S版，自己係老細，辦公室冇咁靚，卡片唔威水，但勝在扎實，唱完歌樓下有司機等你，唔似上一代要喺中環爭的士或者等Uber。

上一代其實唔係好使點用腦，工作其實同順豐差唔多，做文件交收；或者同秘書差唔多，搵啲圖搵啲字對吓對吓。S版，做嘢要搲爆頭，諗少步都死。

佢哋真係要用盡渾身解數，諗計度橋，見招拆招。S版係貨真價實識用金融，上一代只係識用Office。

好不幸，S版同傳媒塑造嘅典型，係唔同晒款。你唔會用電郵搵到佢，佢出入唔係IFC，娛樂地方唔係蘭桂坊，日常唔會着晒西裝打晒呔。

不過，同上一代極類似嘅，係你老遠都會望到邊個係金融才俊。點望？邊個最多女仔圍住嘅，嗰個就係才俊，大自然定律係千古不變。