2016年4月21日 - 信報
報紙經營特別困難，先有報紙凍薪，再有報紙炒一個人，都話經營困難。報紙賣紙趨勢必定係愈嚟愈少，當呢類疑似經營困難、實際可能是鏟除異己嘅動作接連出現，大家唔再相信報紙講真說話，唾棄更快，跌紙更急，最後成份報紙都要執。而家環境係找尋事實憑睇片，要求分析靠「些牙」；報紙，如果既欠事實亦無分析，還有什麼存在價值？除咗行內人同員工對經營困難炒一個人有強烈情緒反應之外，尋常百姓係冇乜反應。除咗係「有冇搞錯呀」嘅事香港每日都唔缺乏之外，最重要係，報紙嘅內容如果冇乜人留意，報紙本身自然亦冇乜人注意。
香港怪嘅地方，唔止經營困難要炒一個人，還有炒呢種人。香港人好鍾意炒賣，上至樓房股票，中至名錶手袋，下至手機門票，通通有得炒，炒賣意識根植每個人腦中。但同時，香港人亦好痛恨炒家，覺得佢哋令價錢飆升，自己無端端要買貴貨，炒家除咗食價之外，毫無增值，人人得以誅之。
生活必需品如果有炒賣，的確係人神共憤，影響市民生活。但係必需品以外嘅炒賣，提供流通量，撮合賣家用家，佢哋係有增值，而增加之價值亦隨時間改變。例如Ruby Seven門票，冇啲鬼佬喺銅鑼灣站口叫賣，一係就有門票被浪費，一係就有擁躉望門興嘆，炒家令佢哋雙方都happy，賺多賺少睇佢哋開價同本事。
又例如樓市，現在全用家，炒家絕跡。結果係，價錢如大多數人意願下跌，但同時成交跌到令樓市完全唔流通，你聽日等錢使，層樓除咗攞去按，你想劈價套現都唔得，只有撞啱心水嘅用家先會接，缺乏只問價錢不問喜好嘅炒家幫你去頂。炒家提供嘅liquidity，從來得唔到人認同。
股票其實冇用家
股票更加唔使講，除咗大股東之外，股票其實係冇用家，嚴格嚟講大股東都唔係股票用家，不過呢一點唔係好多人參詳得透。普通股票投資者，更加唔應該覺得股票係資產，唔派息嘅股票係郵票，就算派息嘅股票都只係當票，到時到候俾啲利息你，紅嘅時候有人搶，黑起上嚟隨時熄燈，冇仇報。冇用家嘅物件，你只係其中一個炒家，希望有日下家會將你用高價買來的股票用更高價接收。買滙控（00005）你有息收，但如果話你知滙控股票賣唔出，只可以永遠持有等收息，你仲買唔買？買股票嘅人全部都係炒家，以用家心態入場嘅，最早輸晒離場。
同報紙唔認點解炒人一樣，香港人唔會認自己係炒家，亦唔會認炒賣原來係香港經濟繁榮嘅動力。iPhone冇得炒，人氣地點先達變咗吉舖死城；樓冇得炒，地產代理要跪地開單，月尾唔夠數，裁員轉行乜都有；股票唔使講，冇咗「大時代」嘅炒賣氣勢，你今年係咪搵少好多，唔敢使錢？冇得炒經濟唔會好，冇人敢講，「炒」字太過邪惡。
事實上，香港只剩下股票有得炒，「一國兩制」只有股票制度仲守得住。信我，他朝香港人殺埋炒股票，選議員就唔再被指為浪費生命，因為全香港只有議員呢份工保證你4年有糧出，其他工種就如報紙總編一樣，你連掌握生命都唔得，談何浪費？
沒有留言:
發佈留言