後生仔勇敢到你唔信 - 方卓如

2016年3月9日 - 信報

國際清算銀行出咗份報告，話唔少中央銀行實行負利率，對經濟可能有影響，因為唔知一般市民同埋機構投資者會如何反應。見到呢份報告，大家可能仲驚過見到負利率，原來本應企喺最高點、望住全世界發生什麼事，而又掌握最多資料數據嘅國際機構，可以對世界運作接近無知，你應該要識得擔心，有權有資訊嘅人幾可肯定會做錯事，搞到你雞毛鴨血。

負利率係中央銀行搵成個國家嚟做實驗室，去測試從未見過嘅貨幣政策究竟能否幫助經濟。負利率是否有效，未有歷史證明，但係個人同機構嘅反應，係唔要猜度，專家本身都係個人，通街都係機構。專家問吓自己，打兩個電話問吓機構朋友，就知道佢哋會對負利率有乜反應。

投資要學睇宏觀貨幣政策

經濟是否受惠負利率，可能有待歷史驗證，但係反應呢啲咁貼身嘅嘢，專家話唔知，表示佢哋閉門造車到極點。靠有權嘅人幫我哋把關，應該瓜得仲快。前輩教你投資前要做功課，睇財務報表，而家我勸你最好眼界遠大啲，學識睇宏觀貨幣政策，識得睇信貸爆破先兆，咁你先有資格去保護自己嘅投資，免於化為灰燼。

而家鼓勵啲後生仔唔好故步自封，唔好掛住買樓，出去衝，用意係好，但係唔好忘記，而家後生仔比我哋當年大膽勇敢好多，勇敢到你唔信。你睇吓最近咁多學生自殺，壓力大係一回事，但係死都唔怕先至得人驚。

我哋𡃁仔年代，十個有七八個，諗埋一邊，唔係咁開心，諗過自殺去死嘅，分分鐘你自己都試過。冇自殺，唔係你諗通咗，係你唔夠膽。要去死嘅勇氣其實大過你唔去死，啲人話生存下去繼續捱需要更大勇氣，廢話，自行了斷幾時都係最得人驚。而家後生仔咁勇，你叫佢哋去闖，但係客觀環境咁惡劣，每日都見到荒謬絕倫唔公義嘅事情，咪即係叫啲後生仔壓力爆煲、反抗更大？老一輩嘅人一邊廂教訓啲後生仔要眼界闊啲，唔好埋怨環境唔好，令佢哋生活艱苦，唔該佢哋同時間唔好再做啲核突嘢，畀人睇穿就係呢班老嘢，搞到香港嘅環境唔適合後生仔住。