建制一樣可以本土 - 方卓如

2016年3月1日 - 信報

新東補選結果，有兩點要留意。之前講嘅棄六保七係啱嘅，贏一萬票係險勝，如果唔係全力截住隨心而投，要理智集中投七，可以預期六號票數更高， 七號就僅敗，呢個情況絕對有機會出現。本土派嘅票應該比而家嘅15%更高，自由隨心投票的話，點止六萬幾票？

當然，候選人本身質素都係重點，無可否認楊岳橋話梁天琦係高質素嘅對手，此話並非敷衍行貨， 睇辯論睇答記者問題就知，水平拋離一批抽水中坑幾條街。將來本土能否保持聲勢，都要靠拋個身出嚟嘅人。

講人話有特別效果

更重要一點嘅係，本土派話而家三分天下，但其實點解建制唔可以分拆本土出嚟，變成四分天下？建制唔可以有本土論述咩？年輕本土話要以武制暴，建制本土唔可以用制度制衡制度咩？香港良心前科有用辭職拉倒廿三條，近期就有因為炮轟梁特引致被搣柴，呢啲咪係建制本土嘅樣板。

年輕本土身體力行衝擊水貨客，令佢哋喺北區嘅支持率成為新東之冠；香港良心人到退休膽更大，公開講人話，令離地中產覺得啱聽，一樣有支持。

兩邊本土比較傳統左右陣營支持者人數略為輸蝕，但論威力同可以達到目的方面，兩邊本土更勝一籌。年輕本土毋須多講，建制本土有乜建樹？最近你聽到香港良心喺立法會話唔服氣，同鄧永鏘喺FCC鬧梁特，聲音比任何一個泛民嚟得鏗鏘。有睇奧斯卡就知，驚喜效果就係要估你唔到，例如最佳影片偏偏唔係DiCaprio嗰套，反而影帝就喺大家怕佢又輸嘅氣氛下頒畀佢。

同一句說話，落入建制嘅人口中說出，有特別效果。年輕本土靠衝令到香港唔同咗，如果多啲建制本土出現講人話，甚至在某要緊關頭下拉布，佢哋先有本事改變大局。

建制本土唔係無可能出現，香港良心唔在講，財爺自己都多談本土，連預算案都畀錢拍廣東話嘅港產片。上次毛記分獎第一次將網上世界入屋，偏門變主流；今次補選將小撮本來無名之徒，提升至政治勢力佔一位置嘅一旗之主。社會嘅變化經過醞釀沉澱，就同累積沼氣一樣，撻火即着，世界馬上唔同晒。情形就好似Donald Trump，而家先知原來美國人真係buy佢亂噏，連《經濟學人》同《華爾街日報》嘅評論，都話要截住佢，咪畀佢得逞，否則滅黨滅國。離9月仲有半年，乜嘢都有機會發生。

建制本土會唔會好似年輕本土因為一串魚蛋就成為新政治勢力，主要還是看質素。