最後一個國父 - 方卓如

2015年3月24日 - 信報

地球上最後一個國父李光耀都死埋，而家除咗ISIS之外，都冇開國呢回事，國父呢啲咁grand嘅term，而家都冇人擔當得起。佢在任嘅時候新加坡學香港，佢唔撈之後到香港學番新加坡。究竟係新加坡超越咗香港？定係香港倒退寧願放棄踏步向前？去過新加坡嘅人都唔想香港變成咁，但事實係，香港可能已經變得衰過新加坡。乜都唔使講，人哋住間屋已經一定大過你。城市係有生命，花無百日紅，小津都可以曾經係金融中心，香港曾經係威係勢，要沒落唔好以為係天方夜譚。

雖然李國父死咗，但睇番佢之前喺電視嘅訪問，直情為而家嘅香港把脈斷症。

新加坡都有共產黨，李國父本身好討厭共產黨，但權力未鞏固之前，都要同佢哋扮friend，深藏不露。用佢嘅說法，係腳踏實地、務實，講完。新加坡共產黨都未聽聞係啲厲害團體，性格強如李國父喺羽翼未豐嘅時候都要吞聲忍氣，香港人有時要問自己，究竟想發洩定係事成，好多時候想事成就唔到你發洩。

立心奪權者最穩陣

「日本人教育我權力是什麼意義，政權可以改變人民的思想，社會的心理」，呢句係佢形容日治時期佢過嗰幾年得到嘅領悟。佢當年冇俾日軍槍斃先有今日，佢講大話用計走甩然後躲起來避日軍。從政兩大要點，佢都齊晒：奪權同長命。奪權要一定過程，過程未完你就死，前功盡廢；夠長命但無意志去奪權，學乜嘢從政？香港咁多個人從政，得一個人係立心奪權，其他人係等指示等安排。香港人唔好以為你哋唔鍾意嗰個勢危，在位之人立心追求權力，比所有人都穩陣。

有人問李國父，新加坡民智甚開，點解得唔到信任，冇民主自由？李光耀話佢贏過幾多幾多次選舉，佢比提問者更有資格、更懂新加坡。係人都知人民行動黨選舉贏梗，李光耀選舉前都已經可以宣布勝利當選。See？一人一票可以令獨裁者變得理直氣壯。多謝李國父，你解答咗點解好多香港人覺得一人一票硬係有啲唔妥。