識得跌搵得仲多 - 方卓如

2016年6月2日 - 信報

我師傅好耐冇出過場，搞到有人以為我欺師滅祖，過橋抽板，唔識人。實情師傅佢老人家都要周遊列國，四圍去享受佢嘅嗜好。而家見番佢嘅真身，佢老人家又後生咗，個個估佢嘅年紀總係細十年，唔到你唔服。

佢老人家夠食但係唔退休，依然係好貼市。一年做啱幾樣嘢，咁就收工。

最近我發現佢跌多咗，唔係跌親，係跌錢跌多咗。雖然跌嘅都係面嗰浸，唔會對佢生活質素有影響，但係叻人，而叻嘅結果係錢多咗，點會接受自己跌錢？我諗極都唔明，趁食飯時間開口問佢。佢微笑，唔答，只係指住枱面支叉，白癡如我都識得收聲唔追問喇啩。

但係識睇眉頭眼額嘅我，點會唔識自己搵答案？有時候問題嘅答案唔使用耳聽嘅，係用眼睇。我師傅跌得，跌完之後搵得仲多，呢樣咪要寫個服字囉。

唔靠消費尋開心

好多人唔明，錢只不過係紙一張，成疊放喺夾萬同放疊報紙冇分別。你使錢，都只不過係換領資源，換到咁上下你已經麻木晒，唔會令你生活滿足感有所提升。

而家全世界經濟慢咗落嚟，好大程度係新一代人唔再係靠消費嚟尋開心，追求嘅係啲簡單生活，食齋。

唔再不斷追求資源，唔再稀罕消費享受，經濟當然唔會砰砰聲直線上升。

我師傅老早過咗要使錢尋開心嘅階段，有乜嘢未嘆過？佢跌，唔只係跌得起，又跌唔傷，仲係因為超級自信，知道搵得番，而且跌畀人嘅，人哋會抬番畀你。肯畀人賺甚至輸啲畀人，呢啲就係我師傅道行高嘅地方。我唔夠膽問佢究竟總共跌咗幾多，費事佢又指住支叉。

佢知道，如果話我知佢跌幾多就等於話我知佢搵到幾多。