情深慘況未曾來 - 方卓如

2016年5月17日 - 信報

科技先進，而家唔使响辦公室都可以辦公。你以前冇電話，但係坐响辦公室就可以開工，今時今日有部手提電話，就算你喺海灘一樣可以辦公，家陣反而如果你冇帶電話，坐响辦公室你倒一事無成，乜都做唔到。

以前我喺北京嘅的士入面，一邊塞車，一邊用啲A4紙寫稿，回酒店先scan後email。而家，坐喺車入面用iPhone就可以寫稿，寫完即刻交得。十年之後，工作環境會變成點，冇人知，但可以肯定，社會唔需要咁多勞動力都可以保持生產力，人浮於事係必然。

社會係靠稅收同就業去分配資源，股票市場同物業市場崩盤，至多係社會經濟受挫。但係就業市場有什麼差池，係會引起社會動盪。所以聯儲局衡量QE成效，繼續放水還是收水，都是以失業率為指標。當下一輪說好的爆煲來臨，最得人驚嘅係除咗政府已經冇晒子彈去救市之外，仲加上科技進步令到勞動力要求大大降低。有時人力轉型都唔係咁容易，唔通個個都可以中年轉行寫Apps，或者走去填歌詞賣咖啡廣告？無可能，一大批中年人注定係會喺就業市場淘汰。

科技消滅人類工種

經濟衰退引發社會動盪在南美洲已經發生，委內瑞拉同巴西係例子。美國係經濟大國，《金融時報》最近分析成個國家嘅中產階層幾乎被鏟走。中國未來係L形經濟增長，權威人士都話最重要係保持工人就業，企業可以唔救。香港資產價格尋底，失業率持續上升，政府又唔需要我多講，危機係同世界接軌。

中國人有句說話，由奢入儉難，呢樣就係經濟衰退帶嚟嘅最大痛苦。從來都窮，未嘆過，感受唔到乜嘢叫衰退。只有使慣咗，突然間冇，先至難捱。

所以我話，七十年代出世嘅人，經歷由冇到有， 睇住社會急速進步，而家人到中年，上有父母，下有個千禧BB，而家面臨嘅係科技消滅人類工種，還有說好的爆煲大禍臨頭，書又讀得多過人，腦筋清醒但心地正直，面對而家世界好景走到盡頭，佢哋先至係情深慘況未曾來。