唔係啱只係未錯 - 方卓如

2016年2月12日 - 信報

恒指跌700幾點，成交唔夠700億，證明好多人仍然放假中，未開市，還未參與沽貨行動。市場仲等緊特大嘅爆煲事件，未有大鑊嘢出現，跌市係唔會完，冇人會肯放膽入市。

日圓突然大升值，換番嚟嘅日圓究竟擺咗喺邊度？日本存錢負利率，股市下跌，國債孳息率穿零，冇一樣日圓資產係可以為你帶來正回報，但係市場爭相購買日圓。經濟學嘅理論好多時候唔能夠搵到直接證明佢係啱，只可以等證明佢錯嘅事例幾時出現，出現之前理論都仲係正確，唔係啱，只係未錯，2016年相信會打破好多經濟理論。唔好以為係學術討論，唔關你事。經濟理論錯誤，表示政府會有好多錯誤動作，會搞到你生活得好艱苦。

政府做錯嘢嘅機會其實比做啱嘢係大好多，因為而家世界互相糾纏，千絲萬縷，政府跟唔上時代係好自然嘅事。

上年係中國政府，今年開始係日本政府，好快亦會輪到美國政府，三大經濟體連環向世界證明，佢哋一心挽救經濟嘅方法反過來搞壞經濟，市場人士用自己嘅方法自救，唔會再旨意政府。

思考要跟上年代

回歸差不多廿年，連而家嘅大學生都未在殖民地時代有意識地生活過，冇我哋以前嗰種借來的地方，借來的時間嘅觀念。當佢哋識得思考之後，就認定呢度係佢哋過世嘅地方。佢哋成長同互聯網相結合，就算閉關唔出街，識嘅嘢都多過我哋。結果係，佢哋唔易無條件地接受上一代嘅指令，更加唔使旨意幾句說話就可以打發佢哋。

我哋呢一代仲係自己去遷就環境，佢哋行出嚟就係要改變環境。無可否認，不論建制還是反建制嘅年輕人，佢哋都做緊我哋當年無諗過會做嘅事情，比我哋更前。而家全世界嘅運作同以前唔同晒，改變環境同投資搵錢都唔可以單純用自己以為啱嗰套。要用腦嘅年代，你要思考得更刁鑽。