香港仲有啲揸拿 - 方卓如

2014年12月5日 - 信報

大家見我日日喺呢度寫到香港好似好慘咁，唔係，係應該話寫到香港人好慘咁，一定覺得我諗得好灰好消極。錯，剛剛相反，我不知幾積極，我只不過比一啲人先天下之憂而憂。睇到唔對路嘅人好多，只不過佢哋冇地盤寫出嚟啫。

香港人要諗吓自己有乜嘢優勢係內地人係冇。錢唔夠人多，市場唔夠人大，態度唔夠人哋狠，人際關係唔夠人哋深，國語唔夠人哋好，橫睇掂睇，冇樣嘢四正。

港人仲有專業精神

但有一樣嘢應該香港仲有啲揸拿，內地仲未有耐可以追到。係乜？咪就係professionalism。唔係狹義話啲專業人士咁簡單，專業人士都唔一定有professionalism。用中文嚟講，做事認真專業就係professionalism。邊一行都有佢嘅專業認真，你去搭個棚搭得穩陣安全，都係專業認真。呢樣嘢係學唔嚟，係你耳濡目染，見到師傅點做嘢，睇得多又俾人鬧得多，自自然然養成一種專業認真嘅做事態度。

中國人做嘢，基因上都偏向求其，做到差唔多就收工。香港人好在十幾年前有啲鬼佬師傅，傳落啲手勢keep到而家。冇咗啲鬼佬師傅，一樣未散晒啲professionalism，係因為環境充裕，容許你專業認真處理。

冇錯，如果民族基因冇呢種專業認真，就全靠衣食足而知榮辱。你食飽咗咪有時間畀你做事認真，慢慢做。呢種環境，香港仲有，香港人啲professionalism，暫時仲係人冇我有。

呢種professionalism，叫人信得你過。可以安心飲你啲奶粉，去你醫院生仔，幫襯你開戶口擺錢買股票。你同人傾生意，國語又唔得，交情又唔深，錢又唔多，但至少覺得你唔會吹水，得就得，冇花冇假。信得你過，有時唔係你個人，係因為成個城市仲有professionalism。如果我哋自己開始做事求其，見人就仆幾棍，一啲都唔專業認真，我哋香港人就真係冇晒價值。