2014年11月14日 - 信報
兩年前是我第3次亦是最後一次參加毅行者。今朝早，晨早出發去幫其他隊伍起步打氣。就係因為要天未光走去打氣，提醒咗我，我左腳腕的傷到而家仲未好，隱隱作痛，原來已經傷了起碼兩年。
我第一次想起要玩毅行者，係喺一個晚宴講座，一位知名度甚高的女士訴說她第一次艱苦完成之後，點解又被迫玩多一年。嗰陣時我心諗：「嘩！大佬，一百公里，唔瞓，點行呀？我呢啲寫字樓文員，奀挑鬼命，毅行者？唔係我哋啲level嘅人玩嘅。」嗰時一路聽，一路佩服，一路流晒口水，得個恨字。心諗，如果我可以玩到毅行者就好喇。
連麥理浩徑喺邊都唔知，行山嘅山究竟係有路定冇路都唔知，幾年前忽然想行山。買咗本書講麥徑，邊度係基維爾營，邊度係針草帽，搞到好似探險咁。第一次自己走咗去行山，我好記得係幾年前平安夜嗰日。唔會有好多人試過乜嘢係一無所有，我幾年前就試過。平安夜全世界一早放晒工，我一條友冇嘢做，攞住支水，走咗去行山，貪佢唔使使錢。而家講起嚟好似好悽涼，但身處其中，你唔覺，只係覺得好鬼索氣。嗰個獅子山，石級又密又高，行到氣喘，點可能孭住條直幡行上去？你話蜘蛛仔決心幾鬼大。
行到索晒氣、頂唔順嘅時候，我同自己講，垂低頭，一步一步行，總會上到山頂。結果？梗係上到山頂，仲行咗三年毅行者。呢樣一步一步慢慢行，總會到山頂嘅信念，撐到我而家後生過舊時，心理質素仲練到melon都唔使驚。所以話，人生挫折並非壞事，淨係後生過舊時已經賺晒。
毅行者令我想起這段行山自省的寶貴經歷。我梗係唔係想寫行山呀、跑步呀呢啲高尚題目，邊到我寫？但係行山，的確有發人深省嘅神奇功效。又或者，一個人，去到某階段，係時候先死而後生，上天如果待你不薄，會令你在走投無路嘅時候，遇上一樣你從來冇諗過嘅事情，讓你療傷，然後企番起身。當你死過翻生，你對眼就會開，睇到你以前錯過了的事，接受到以前睇唔順眼嘅人。仲有，你會發覺，以前你只能流口水嘅事情，你唔止可以做到，仲可以做得更勁更好。我行山用得最多嘅唔係對腳，係個腦。畀我行行吓，真係諗出自己做人嘅哲學。有人問我點解唔繼續玩毅行者，我答佢：「我而家嘅哲學係，人生苦短呀大佬，我而家先正式開始懂得何之謂活，不斷重複做自己做過嘅嘢，浪費啲掛。」
沒有留言:
發佈留言