2014年10月3日 - 信報
30年前《中英聯合聲明》，當時講一國兩制，講嘅係香港繼續資本主義制度。30年前嘅中國係點，而家40歲樓下嘅人都未必知，梗係同而家你去深圳上海差天共地。你而家由香港去上海再返嚟香港，仲邊度分得出資唔資本主義，咪一樣。
當然，香港嘅制度梗係唔止資本主義，法制、選舉、政府運作等等同內地完全唔同。兩制嚟講，唔可以話冇。但制度係死嘅，人係生嘅。咩嘢人喺制度下做咩嘢事，近年畀人見到先係愈來愈重要。公平嘅制度，畀人扭曲濫用，好制度都可以畀人用嚟做壞事。香港嘅制度其實一路以嚟冇變過，但係點解最近香港人愈來愈氣頂？就係見到相同制度下有人做嘅嘢、講嘅嘢太離譜。所以唔係話制度唔變乜嘢人做都死，就算制度唔變換番批正常、講道理嘅人，市民嘅生活都可以舒服好多。
香港人好純、好善良，示威示到執垃圾，睇到啲外國傳媒眼都凸埋，下巴跌咗落地。外國傳媒未必有心害你，但係想搵多啲角度，整到件事juicy啲，係天性。搞到umbrella revolution，直情靠害。從來革命只有兩種結果，一係成功改朝換代，一係流血、生靈塗炭，邊有中間？
以往革命成功例子，都係喺權力中心搞，邊有喺邊陲地方搞革命。如果法國大革命喺里昂爆發而唔喺巴黎，今日法國應該仲有個路易二十三。香港嘅權力中心你估喺香港咩？遠離權力中心處有一場革命？動搖唔到權力中心，你估權力中心有機會讓這場革命有一個成功之名？人大喺架構上係中國最高權力機構，相信連習近平都唔敢要人大收回決定，人大自己更加唔會打倒昨日的自己。咁而家佔領行動要求的條件，全世界邊個人畀到你？
外國傳媒靠害整個咁嘅名，又捧到香港人天咁高，而家香港人全部變咗熱血青年，high到停唔到，寶劍出鞘，唔見血係收唔番。要特首自己唔撈，仲難過你cut有線。況且，而家佔領者係衝着人大決定而嚟，對付佔領者，係護主有功，加分；換着係你，你會想自己見血定係對家見血？
但係而家香港變成世界焦點，會唔會令到想出手嘅人投鼠忌器，唔敢動硬？你可能唔為意一個殘酷現實，香港對中國可能仲有用，但香港人對中國嚟講已經冇乜用。香港唯一一樣仲有價值嘅，就係有一個有國際集資能力嘅股票市場；除此之外，冇乜用。但係而家個股票市場，已經唔係香港人話事。有乜依喐，上市公司遷址撤資，仲好，唔該賣埋隻殼嚟。任何外資港資想撤，中資即到。驚香港人反面？佔領前所有香港幕前幕後統治人士，已經上晒京接旨。一唔驚你反面，二量你亦唔會。國際輿論壓力？呢幾年國際出口術圍揪中國，都唔係新聞。俄羅斯直情入侵烏克蘭，咁大件事，都唔見有乜國際大反擊。中國要對付一個城市的示威者，最多咪畀人鬧兩日，第三日人哋就會專心賣iPhone畀你。香港要發生一啲地道香港人甚為不快的事情，對中國對國際，都唔係一啲令人受不了的事情。
最弊係，唔係全部香港人都人同此心。你可能覺得而家係是非黑白分明，走出來和平表達意見係天經地義，但有唔少數目嘅人，真心唔係咁諗。佢哋唔係為咗私利擦鞋先至反對佔領，佢哋真係覺得自己先係王道咁先驚，都唔使中央出力，你自己香港人已經可以互毆。到時你哋香港自己打殘自己，中央避免給人口實。呢個醜人，香港政府做硬，亦唔介意做。
呢場佔領運動無論點樣結束，將來都一定加快一國化，唔會再畀你有咁多自由。今次搞到咁多人走出嚟，係政府。可以搞番掂讓人群回家，只可以係政府。能夠避免學生人群受傷，又係政府。香港唔會有事，但香港人一定有事。諗到呢度，我想喊。
沒有留言:
發佈留言