沖水好過揸鑊鏟 - 方卓如

2014年9月26日 - 信報

咖啡作為一種每日經常飲用的飲品，仍然有好多人對咖啡有誤解。

咖啡本身應該係酸，你平時飲嗰啲加咗奶所以唔覺，加上渣嘢通常炒燶啲掩蓋瑕疵，所以你會認為咖啡原味係苦。咖啡豆本來就係咖啡車厘子入面嘅種子，曬乾後變成咖啡生豆，酸係應該。只不過你平時喺茶餐廳飲嗰啲番煲、番煲又番煲的咖啡，酸到同飲醋一樣，自然令人聯想酸咖啡係壞咖啡。但正如飲紅酒一樣，酸係品味的一種。

咖啡因唔係個個受得，decaf係好多人救命之寶。但其實decaf 冇標準，用水猛沖，沖走咖啡因，淨番幾多冇人知。咖啡入面有好多咖啡因，但沖少少畀你飲到，同咖啡入面冇咗一半咖啡因，但全部沖晒畀你飲，邊樣毒啲？冇人知。但肯定，decaf 咖啡冇味。你飲一啲又毒又冇味又唔係平啲嘅咖啡落肚，不如一日飲少杯，飲啲好嘢。

咖啡呢啲細藝嘢，賺得幾多？好多人都會咁問。但係，48蚊個飯盒你會嫌貴，但48蚊杯咖啡你會覺得有型。你話杯咖啡成本高定係個飯盒成本貴？沖杯咖啡難定係炒碟飯難？咖啡師難訓練定係揸鑊鏟難train？你會覺得廚房佬有紋身就係壞人，放假就上東莞happy。但咖啡師有紋身就係有型，你會覺得佢閒時一定係去歐洲流浪，身邊一定有個讀哲學的法國女朋友。世界就係咁唔公平，揸鑊鏟嗰個就唔見得人，沖水嗰個反而可以成為萬人迷。

咖啡其實係「吞卜」嘅最佳工具，你做到攰攰哋，走出去蛇王，喺(車立)撞見老細，佢問你去邊，你話去買杯咖啡，佢會點點頭，覺得你今晚又會為佢開夜，雖然你其實約咗女朋友睇戲未夠鐘。但如果你話落街食支煙仔，整番飛，你聽日可以等收信。咖啡，就係有呢種歧視優越感。

睇到呢到，仲等？落街整番杯咖啡，蛇吓先。