2014年10月8日星期三

合作地不合作 - 方卓如

2014年9月30日 - 信報

你有冇unfriend到你Facebook啲friend?我有。冇辦法,唔敢講黑白事非分明,但係一個人嘅價值觀睇得好清楚。意見可以唔同,但價值觀唔同,點做朋友?我喺Facebook見到啲咁嘅朋友,unfriend。

同樣道理,一個政權搵你幫手做嘢,你諗住回饋社會又好,沽名釣譽又好,你做,你就係政權的一部分。政權要做嘅事情咁多,雖要大量義工,捱義氣。以前你可以政治還政治,你有你一邊回饋社會,一邊鬧政府。你覺得政府咁衰,你就要喺入面幫社會。你會以為自己係臥底,有你,政府做少啲壞事。

而家相反,政府做壞事,你㩒唔住。你坐埋佢嗰邊,佢用埋你個名做壞事。你要同呢個政府劃清界線,就係要唔參與。你唔做佢義工,就係一種不合作。呢種不合作完全合法,辭職唔阻你發達,要唔要放催淚彈?

響應呼籲 辭去所有公職

友人一早呼籲要辭公職抵制這個政權,但係冇人呼應,諗住「我做嘢啫,唔關政治事,社會需要我」。而家社會更加需要你,需要你畀能量市民,嗰啲靜靜地喺街到坐緊瞓緊嘅市民。你同這個政權割席,你唔參與這個政權,就話畀市民聽你企喺佢哋嗰邊。冇得揀,你可以唔出聲,苟且生活下去,但一世苟且,唔代表你搵到自己想要嘅嘢。

我響應友人呼籲,辭去全部政府委任的公職。佢哋提出嘅合法不合作運動,我合作。我想香港好,我唔想香港亂。但帶頭搞亂香港嘅係政府,多方位搞亂香港。我唔想香港亂的唯一方法,就係唔參與這個搞亂香港的政權運作。

我一個人微不足道,政府唔會因我而改變,我只係想以後見到我啲真朋友,佢哋唔會unfriend我。最緊要,我唔想我自己unfriend我自己。

沒有留言:

發佈留言