大時代陸續有來 - 方卓如

2014年9月22日 - 信報

阿里巴巴未可以喺香港上市，對於公司嚟講可能係好事，你睇上星期五成個美國直情係阿里巴巴日，電視直播阿里即時股價變動，分析員多角度、開口埋口分析阿里。

喺香港，邊有咁VIP嘅款待？阿里巴巴係改變世界嘅公司，要放喺世界頂級股票市場，畀全世界的投資者買佢嘅股票，而唔係畀啲內地土豪市場投資人大手大手撳錢。

阿里都學蘋果講生態環境，打鐘都搵阿里生態有代表性的人物打鐘，呢樣嘢連鬼佬都學唔到。通常啲鬼佬真係當上市打鐘係一世人最大嘅成就，一定親自上台威水吓。

打鐘當做show

中國式管理連打鐘都唔放過做show機會，搵幾個唔多人識嘅人上台，全世界望住。當全世界問呢8個人係乜水嘅時候，答案一揭盅，全世界就會知乜嘢係阿里生態。反而成班合夥人喺街上行來行去，又喺交易大堂接受眾人歡呼，兼且接受訪問，仲威。

15年時間就可以成為中國首富，公司市值高過香港地產商的總和。中國式管理除咗喺一個封閉市場可以專心做生意之外，學人學得快之餘，又快速找出如何賺錢的新模式，唔係淨係識抄就可以抄出一個全世界最大IPO出嚟。

14年前，馬雲開檔冇幾耐已經嚟過香港，喺當時科網熱潮時候嚟當講者。當時佢已經有震懾全場的效果，平時台上有台上講，台下有台下傾偈。得佢一個，可以一開口就令全場靜晒聽佢講。

當年還是未拆嘅富麗華酒店，地點已經見證了行業潮起潮落。阿里巴巴已經係一個傳奇，香港都要托阿里的福，將來可能有同股唔同權，大時代陸續有來。