2016年10月3日星期一

無人駕駛你唔敢坐 - 方卓如

2016年9月26日 - 信報

馬雲可以公然任由淘寶賣假貨冇任何責任,仲能夠直斥正牌貨咁貴唔合理。可憐據報在淘寶買咗假貨攞嚟賣嘅小妹妹,竟然係除咗告到佢有案底之外別無選擇。你可能已經唔識教仔,因為面對咁嘅世界,你要個仔識保護自己之餘,仲要發達,惟有教佢要做最惡嗰個,夠惡就可以做好多唔夠惡嘅人做唔到嘅嘢。正如鄉紳可以用極低價租官地做生意,賣文具嘅就要在交貴租同被搬走之間二擇其一。「竊國者侯」、「殺人放火金腰帶」、「忠忠直直……」,古人好有智慧,老早預言香港係一個什麼社會。

機器無人情味

機器能否完全代替人類?如果飛機全自動控制,冇機師在場,你敢唔敢搭?正如股票由全電腦操作,不經人手,純粹由盤路定奪,以快、狠、準嚟落盤,唔靠人類之間互探消息同目測分析,是否贏得更多?「Sully」呢套戲最精警兩句:其一係如果一有事情發生你已經知道如何應變,加上之前無數演練預習,一定可以做到理論上嘅結果。但如果你冇水晶球,遇到前所未有嘅突發事情,你要畀時間定一定神,然後靠經驗直覺去做判斷。

另一精警句係,機師做嘅決定,佢自己都將條命押了上去,所以無人駕駛嘅飛機你唔敢坐,因為機器唔怕墜機,佢唔覺痛。墜機,對機器嚟講,是多了一項新數據,畀佢再作無數模擬演練,下一批乘客就走運,唔會重蹈覆轍。

機器操盤嘅世界,佢哋唔怕推冧個市,因為輸錢機器係冇感覺,只係數字上落。人類輸錢會冇飯食,機器輸錢唔會拔電掣。人類嘅世界,操作上會顧全大局,權衡利害,會幕後講數,所以搭飛機你想有人駕駛,落盤你仍然想有人類參與。等如你見到小妹妹嘅新聞,法律係死嘅,作出檢控嘅唔係機器,係人。

冇人情味嘅法律制度,正如無人駕駛嘅飛機,斷送了人類生命,只係多了項數據。呢種情況,唔係我哋想見。

沒有留言:

發佈留言