2016年10月24日星期一

最多人懷着戒心 - 方卓如

2016年10月24日 - 信報

10月只剩下一星期,睇嚟又可以大步檻過,避免一個股災10月。而家應該係史上最多人懷着戒心嘅時候,從來股災都係發生於紙醉金迷之中,不知不覺間奪去你的財富。咁多人準備股災嘅來臨,個個都識睇嗰市就嚟爆,從未試過。

傳統智慧多數人係錯,少數人先啱,是否代表嗰市唔會冧?

唔係香港先有人睇淡,Bloomberg都問下一輪危機來自何方。最直接嘅答案,梗係邊度借爆廠,邊度借過龍,邊度就係危機。中國肯定係危機嘅熱點,Bloomberg都咁講。情況就好似紙牌屋一樣,搭建得搖搖欲墜嘅紙牌屋,一推就跌。只要唔推,紙牌屋仲可以好哋哋有排玩。

全世界都係搖搖欲墜,只係中國嘅紙牌屋搭得特別高,更容易推冧。

中國係爆煲熱點

香港經濟硬淨啲,唔係紙牌屋,冇咁易冧,但係政治就好易冧,比中國經濟更加弱不禁風。回頭望番,原來香港真正爭取嘅唔係普選,係保留香港生活方式。

生活方式唔單只係物質上,仲有係你以前習慣咗嘅社會環境。冇普選可能只係4年5年你條氣唔順一次,點解人哋有得選我就冇得選。但係生活方式唔同咗,你每日都chok住條氣,好唔舒服。細微到可能你揸緊車聽收音機,個個台都唔啱聽,心中一邊鬧一邊熄鬼咗佢算數。

什麼生活方式改變咗?譬如傳媒,你以前會覺得佢哋中肯,佢哋會如實報道事實。傳媒係會客觀分析,你唔知頭唔知路,睇報紙評論係會得出答案,清楚來龍去脈。而家你可以相信傳媒?偏頗已經係善良,作假陷害都仲得。又譬如,社會名流、上等人家、 專業人士,你以前會覺得佢哋會講公道說話,唔會因為個人利益胡作非為,因為佢哋上晒岸,唔係為搵食,會緊張自己名聲。而家?你從來未見過咁多穿西裝的衣冠禽獸,說話唔尊重人,唔尊重常識,唔尊重自己。

太遲,而家知道太遲。最近嘅宣誓事件,生活方式已經冇得返轉頭,明天再續。

沒有留言:

發佈留言