2016年9月6日星期二

美國社區學院全攻略 - 左丁山

2016年9月6日 - 蘋果

新亞校友謝鵬元律師着人送回一本舊書:話係佢多年前借閱嘅,最近在辦公室「發掘古蹟」時搵到,於是送還。左丁山打開一睇,原來係2002年9月出版嘅「美國社區學院全攻略」,作者余家欣,編輯顧問左丁山,由創高顧問有限公司發行。

14年前嘅事,幾乎已經唔記得,呢本書亦早已在書局書架失蹤,書局一定冇得賣。見到之後,勾起回憶。回歸之後,梁錦松、程介明、戴希立三位名人主持教育改革,有社區學院之議,後來香港就有咗類似美國嘅副學士學位,曾引起討論往美國攻讀社區學院嘅「小高潮」,左丁山在本欄及星島日報寫得多,被新亞師弟莊聖偉(創高老闆)視為美國社區學院專家,搵左丁山做編輯顧問,請余家欣小姐親自到美國參觀考察,採訪著名社區學院(如Foothill-De Anza,Santa Monica)廣泛搜集資料(如申請入學、簽證、費用、轉讀、住宿等等),寫成一本「美國社區學院全攻略」,資料翔實,製作認真,以為會幾受歡迎。

點知香港圖書市場好細,出書一個月成為「暢銷書」,實際銷量只係千幾二千本,莊師弟血本無歸,真慘情;後來有內地一間大學出版社睇中,在內地發售,亦只係銷出幾千本,左丁山以後就唔敢幫人出書咯,想出書賺錢?實在難乎其難。正因為出版易蝕本,加上網站資料愈來愈多,已無人等到出新書,此書出版十四年後,再睇番,仍然係同類書之中資料最紮實,值得參考嘅一本留學天書。講留學,唔係話一定要到哈耶牛劍,尖子去邊度都得,但對考試有take two嘅學生嚟講,到美國進入比較有名氣嘅社區學院,仍然係上佳途徑。

香港與美國教育環境非常唔同,香港大學學額少,極少大學生半途而廢做drop-out,因此副學士想入港大中大,機會唔係冇,只係好低箒,美國就唔同,以加州為例,只要讀社區學院嘅GPA有3分以上,幾乎肯定有UC(加州大學系統)接收,由柏克萊、UCLA,以至Riverside,Santa Cruz都得,視乎GPA而定。香港尖子想直接入柏克萊、UCLA,機會率甚低,但經左丁山介紹報讀Foothill嘅,冇十個都有八個轉入(transfer)UCLA及USC畢業。道理好簡單嘅箒,想話中一入聖保羅男女呀,要好叻夾夠運,但在中二插班呢,機率立即提升,因不少Co-ed學生在中二就離港去英國讀寄宿學校,騰出學額吖嘛,文憑試之後,成績唔夠理想仲有第二次機會入美國排名高嘅大學嘅,最緊要嘗試,努力搵資料,明年考DSE嘅學生,現在就準備Plan B。

沒有留言:

發佈留言