股市難過籃球 - 方卓如

2016年6月1日 - 信報

風水佬呃你十年八年，我都話一定係Warriors贏，冇講錯啦！我唔會模棱兩可，講啲「好大機會」、「如無意外」咁鬼安全嘅說話，一句就一句。NBA有咗明星對決，係繼MJ年代之後再度得以成為世界賽事。打得緊湊嘅籃球比賽，刺激過足球。

5月埋單一啲都唔窮，6月分分鐘都唔絕，要分析股市嘅難度在於：股市根本冇得畀你分析。跌，你又唔知點解；升，你又冇原因。

冇得分析

每個人手上嘅資訊都唔齊全，而邊樣左右升跌又講唔實，仲難分析過NBA邊隊贏波。每日都要測市嘅工作，一啲都唔過癮。

工作唔係測市，自己分析研究又如何？除非你可以齋吹唔投，只係研究、不作投資，咁就可以當考眼光，課餘活動。如果係分析完之後自己入市，咁就唔好制，最後一定係輸錢離場。一開始就輸，晨早就打沉你，恭喜你，輸得最少。如果畀你連贏幾鋪，咁就死得，一定係輸到你服先至停。以前成日有人叫你要諗要分析，要做功課，其實害你，搞到你以為自己投資緊。究竟有幾多次真係畀你計中贏錢，還是符碌搞掂，心照。

股票投資係一個過程，係鈔票換股票再換鈔票， 愈換愈多就係叻仔，愈換愈少就唔該你收山。如何愈換愈多唔係睇你分析得幾多，係睇你企喺食物鏈邊一個位置。最尖端嘅位置，集七種武器於一身，乜都要識，唔係你想企嘅位置，因為好鬼煩。作為業餘人士，搵兩餐茶錢，買嚟擺低唔使煩，其實係最啱路數嘅做法。

唔使做咁多功課，搵啲唔會停牌，唔會執笠，長期派息，可以交畀個孫嘅，就買嗰啲。