2016年6月16日星期四

俾一句話玩死 - 方卓如

2016年6月16日 - 信報

A股未能夠納入MSCI指數,大市先跌後倒升,證明大戶相信A股係冇可能「入摩」先沽,撳到落最低先至平倉。點解話佢哋一早相信甚至一早知道?你睇MSCI講話要delay嘅原因,包括關注停牌機制、20%每月調錢離國上限,呢啲係一早知嘅存在問題,仲話係廣泛聽取咗市場意見。即係話,市場人士知道乜嘢事情令到佢哋唔想A股入摩,逼佢哋要焗買。

麵包可平過麵粉

只有唔係响市場核心內圍嘅人先要估得定唔得,真正市場人士老早影響到MSCI千祈唔好加入A股。你聽到有人話A股有機會「入摩」嘅,佢哋都係核心嘅外圍。

香港人每日接收到嘅資訊唔單只多,仲夠毒,自細就被毒害思維,令佢哋喪失了正確思考能力,例如樓市唔會跌得去邊,因為建築成本不能再跌。點解樓價會同建築成本掛鈎?原來因為發展商手上土地成本唔平,加上建築費人工非常貴,佢哋唔會蝕本賣貨,所以樓價喺成本加利潤等於唔會跌得去邊。邊個話發展商唔可以蝕賣?而家發展商瘋狂提供借貸,只要你肯簽個名,願意應承還債,咁你就係業主。同銀行上會唔同,壞賬風險唔响銀行,發展商孭晒。買家還唔到錢破產,變銀主盤,發展商就係手持一件蝕本貨。提供足額貸款畀買家,已經係蝕賣之前嘅最後一步,簽個名就做業主都去唔到貨,下一步就要低頭,麵包係可以賣得平過麵粉。自住就唔怕買樓,呢句話毒咗香港人幾十年,自住唔一定可以買樓,因為你未必有本事還清條債。未來冇工做或者人工愈做愈奀嘅香港人係愈嚟愈多,到時你會發現成世仔,就係俾一句話玩死。

沒有留言:

發佈留言