人類行為不可預測 - 方卓如

2016年6月15日 - 信報

我話咗，Warriors疊馬，佢真係第一節就用足11人，車輪戰；半場打成平手，證明冇咗Draymond Green都冇劣勢。只係下半場其他主力射極唔入，輸波唔係我形勢分析錯誤，而係人類行為不似預期，好彩估錯嘅後果只係要睇多場。

既然人類行為不似預期，咁英國脫歐變成觸發世界金融大亂嘅機會就大大提升。卡梅倫夠膽公投是否脫歐，一定係計過數估計到結果係留歐，就用公投一次過將呢個議題消滅。佢之前喺蘇格蘭獨立公投已經贏咗一次，證明呢招見效。直至上星期前，留歐都係人類預期。不過，佢未必知道背後搞鬼想英國脫歐嘅力量原來咁毒。

俄羅斯打敍利亞，逼難民湧入歐洲，令各國右翼本土主義抬頭，每個歐盟國家幾乎想鎖國排外。最近俄羅斯有150名受過特訓嘅足球流氓入場專打英國球迷，就係搞到你英國同歐洲勢成水火。

負資產未算高屬假象

西方國家推冧油價想搞散普京檔攤，普京就搞散你歐盟令你後欄失火。經濟從來都係為政治服務，你只係懂數字而唔知世界大勢，輸死你。

樓市仲有冇得跌成為話題。但其實，樓價點會唔跌？連銀行都裁員，仲有邊份工令你安心買樓？負資產數量仲未算高其實係假象，以市價計你可以仲係正資產，但係以resale value計，好多人已經係負資產。辣招之下，你要賣樓一定要市價之下賣，而你要借盡發展商九成按揭先上到樓，咁仲唔係負資產？

香港人俾人落藥幾十年，人生就係要以買樓為目標，但係一買就輸都不自知，以為自住就唔怕買， 人類行為不可預測，此為經典極品。