2016年6月14日星期二

失去主力反而會贏 - 方卓如

2016年6月14日 - 信報

NBA第五場,Draymond Green要停賽,唔好以為幫Warriors頂住LBJ,咁就整定Warriors可以贏波封王。點解冇咗個主將反而會贏?Warriors嘅口號係strength in numbers,文雅啲講係「人強馬壯」,俗啲講係「疊馬」,Warriors就係人多,後備嘅都可以對付你。而且呢隊波知道自己實力高一班,睇住食,慢慢發力。

而家主力畀LBJ害到要停賽,成班波嚴陣應戰,同你嚟真,我話嘅,贏硬。

失去主力反而會贏,世界就係咁矛盾,成日都出乎意料,成日都估你唔到。如果說好的大爆煲真的來臨,應該係史上最多人估中嘅大跌市。從來大跌市都係殺你個措手不及,在歌舞昇平中突襲,不知不覺間令你輸錢,邊有好似今次,全世界都話會大冧,沽空大鱷走在你面前提示「我哋嚟沽喇」咁體貼?1987年、1997年、2000年、2008年,有邊次係大家一早預備定等大跌市來臨?無!全部都係一個浪殺過嚟,由你唔信殺到你驚。基於市場應該係啱嘅人少錯嘅人多,咁多人估一定大冧,全部買莊,你係咪應該買閒?

買資產要睇國籍

說話可以亂講,銀紙係最誠實。如果咁多人睇淡要沽,唔使爆煲個市都會畀你沽冧。美股仲係貼近歷史高位,如果你相信市價係反映晒所有市場預期,咁即係而家吹到咁大嘅冧市危機,都未係咁恐怖。究竟你應唔應該瞓身盡沽市場,等待終極一跌?太早估中輸得慘過估錯,視乎3個要點:你意志夠唔夠堅定、你夠唔夠子彈、同你條命夠唔夠長。

唯一最強嘅冧市先兆係全世界10萬億美元國債畀人買到變咗負利率。你而家應該知道點解日本畀人話咗經濟衰退廿幾年,日圓竟然係避險貨幣而唔係危險貨幣,因為佢係唔會賴賬唔還,同埋滙率係唔可以完全自主,要為美元利益效力。而家跌到負利率或接近負利率嘅,係德國同日本10年國債,佢哋係最後嘅必然還債國。你買俄羅斯債券,佢有唔還錢嘅前科。

買美國國債,佢有本事令債主得不償失。資產是否安全,除咗係睇資產嘅種類,最重要係睇資產嘅國籍。

沒有留言:

發佈留言