勇士星期四有機 - 方卓如

2016年6月21日 - 信報

我講咗，一場過，邊個射得入就邊個贏，冇得估。LBJ射得入，贏晒，無話可說。籃球正式開始放暑假，我都跟手一齊準備放假。

上半年轉眼就完，定勝負只睇星期四。脫歐就齊齊玩完，留歐就下半年再嚟過。留歐唔等於說好的大爆煲唔會來臨，但基於危機唔爆就等於無，全世界又可以捱多一陣，玩多轉。今年嘅主軸係唔可能發生嘅都可以發生，從未試過唔代表無第一次，任何紀錄都可以被打破，所以騎士可以後來居上第一支球隊連追三場攞冠軍；李斯特城1賠5000都可以攞英超，仲成為唯一一支冠軍隊唔係挖人角而係被人挖角；特朗普由俾人笑而搖身變成總統候選人，年尾仲有機會做埋總統。

See？世界就係向沒有可能進發，成真之後，你就覺得理所當然，好平常啫。英國脫歐，世界大亂，而家你覺得唔會，真正發生之後，你咪又覺得冇乜嘢。

世界向沒可能進發

從來贏錢都係重手殺盡之後撈番，星期四就係勇士一展身手、富貴險中求嘅機會。

英國唔怕經濟受損，最怕係移民湧入。40歲以下嘅人，唔講錢，用錢係引誘唔到佢哋。況且，40歲樓下嘅人，物質要求唔高，使錢愈使愈少。經濟其實就係使錢嘅總和，使錢少咗，經濟必定下滑。未來經濟點計都唔會有過去40年咁澎湃，人人都係揸住啲錢放喺床下底。

可以肯定，未來衡量一個國家嘅生活水平，再唔係單從GDP計算，因為GDP數字以外嘅事情，先至係40歲樓下所追求。羅馬新市長37歲，佢選舉要做嘅，唔係振興羅馬經濟，係處理羅馬嘅垃圾。