戴勞定戴PP - 方卓如

2016年5月18日 - 信報

原文照錄，報載白加道豪宅外籍銀行高層，屋企被爆竊，損失財物包括十隻手錶總值30萬元、首飾總值26萬元，現金5萬元，手袋9000元。30萬元10隻錶，平均每隻3萬元，買隻「勞」都未夠；26萬元珠寶首飾，一粒兩卡E colour vvs2 triple ex 嘅鑽石都要30萬過外。現金5萬元，好多炒股票嘅古惑仔身上都唔只袋5萬元，點會擺入夾萬？9000蚊嘅手袋……呢位銀行家住山頂，都相當樸素。又或者， 怕樹大招風，講少啲，反正佢知道，被人偷咗嘅都唔使旨意搵得番，費事畀人知佢擺咁多嘢喺屋企。

銀行家要發　先要個客發

銀行家戴隻3萬蚊嘅勞還是戴隻30萬嘅PP，好睇自己本事，冇得呃。銀行家全部靠客為生，唔係自己做生意嘅生意人。同揼骨一樣，你接客湊客工夫是否獨到，決定你戴乜嘢錶。揼骨嘅有咁多冧把，要儲客都唔容易。銀行家仲難，每間銀行嘅先天條件成日變，你控制唔到。就算喺銀行入面，咁多同事，個個精英，位位叻仔，要突圍，畀你有機會湊個好客，難過客人揀你揼骨。

銀行家只有一個任務，就係要幫客人搵錢。邊個幫客人搵得錢多，嗰個就係成功嘅銀行家。客搵錢先過你多過你，銀行家要發，先要令客人更發。令客人更發之前，先要客人信你，而信任係由一點一滴累積賺錢而嚟。即係話，你不斷為客人賺錢，賺到某一個位，佢信你，你幫佢勁賺一鋪，咁你就上岸。

唔易做，就算你有呢個本事，都要有緣分遇到個令你發嘅客人。銀行家知道邊個客係有錢人，但有錢人唔一定會畀機會你。呢個時候，就係銀行家使出自己本事嘅時候。通常令銀行家發達嘅機會，都係要幫客解決一個超級大難題。呢個難題，通常冇前科冇案例，有嘅話，個客自己搞掂。就係一啲新問題，冇人知道應該點搞，銀行家九牛二虎之力，無數個電話加見面，幫客人搞掂賺大錢，銀行家此時就知道，可以去買隻心儀已久嘅PP5204。