年輕人嘅世界 - 方卓如

2016年5月16日 - 信報

而家個世界係年輕人嘅世界，冇得講。一級方程式贏西班牙站嘅係18歲嘅Verstappen，最年輕嘅方程式分站冠軍，雖然係拜最勁嗰兩個車手一齊炒車，不過佢都贏咗另外兩個世界冠軍。

而呢兩日最紅，梗係年輕人令黎明二次爆紅，首次叫香港人愛上看廣告，睇完又睇，仲要走去買咖啡。呢啲咁破格嘅賣廣告，唔係啲上年紀上晒位嘅老海鮮可以諗到，你話，有乜法子唔承認，係年輕人嘅世界？

正資產恐怖過負資產

而家個世界亂晒籠，同以往大家認識嘅規律完全唔同晒，如果用以往人哋同你講嗰一套去生存，你會生存得好痛苦。舉個例子，大概廿年前，開始有負資產概念，原來買樓都會變成資不抵債，買咗層樓都唔夠贖契，開始知道負資產原來好痛苦，負資產會推冧樓價。

廿年之後，負資產雖然上升，但數字不可同廿年前相提並論。負資產唔嚴重，並唔代表樓市好安全；相反，今時今日正資產可能仲得人驚。負資產係賬面數字，只要一日你供得起，買貴咗層樓唔使死。今日，賬面上係正資產，但係辣招之下，二手按揭不足，市場成交冰封，實際係賬面正資產，成交負資產，你要肯輸先可以賣樓。再講，供得起守得到，負資產就當買貴樓，仍然捱到。但係近幾年買樓要大額首期，蠶食晒你可以守嘅本錢，一旦失業，你連食老本、坐食山崩嘅機會都冇。你又冇能力蝕讓賬面正資產嘅物業，活生生被挾死，賬面正資產嘅恐怖在於不能統計成交負資產嘅樓宇數量，等你仲以為而家樓市健康。

市場嘅滑落規律係一個接一個，先係股票市場，繼而物業市場，最後係就業市場。而殺到落就業市場，物業市場又進一步下跌。

失業率今年會持續上升，負資產宗數會繼續上升，呢個數字放大幾倍，先可以話到你知情況係幾嚴重。