2016年5月9日星期一

愈生面口愈得 - 方卓如

2016年5月6日 - 信報

「方帥,今個星期有乜好嘢分享?」

「好嘢?就嚟世界末日,仲邊有好嘢。特朗普得到咁多支持走去選總統,你唔驚?唔好睇小呢吓嚇驚全世界嘅創舉,背後含意非同小可。最初美國人可能係俾特朗普出位言論呃咗,覺得佢講嘢啱聽,刺中心坎處,所以支持佢。但久而久之,全世界都攻擊佢,佢又繼續言論出位,都仲係咁多支持,證明支持者係經過深思熟慮,並唔係受言語哄騙。咁即係話,特朗普係美國社會嘅縮影,真正代表一班美國人嘅心聲。美國有咁多特朗普思維嘅人,你驚唔驚?」

特朗普狙擊希拉莉

「佢攞到提名啫,唔一定做到總統嘅。」

「弊在佢對手係希拉莉,後生仔寧願支持個阿伯Sanders都唔支持佢,證明傳統主流嘅政治人物開始out,連美國都想要老鮮肉。希拉莉打滾咗咁多年,咁多年嘅公開track record,轉軚取悅選民根本冇可能。對住特朗普呢個重炮手,咁多罩門畀佢發揮,希拉莉只可以捱打,不斷失分。傳統主流同破格敢言相鬥,今時今日嘅世界大勢,邊個贏?」

「美國咁得人驚,好彩香港唔係咁。」

「你就錯喇草蜢仔,特朗普現象係全球趨勢,互聯網嘅世代,個個都追求真,唔怕你係惹火言論還是金句王,只要夠真夠一致,憎你嘅慢慢都要佩服你,繼而開始接受你,最終分分鐘愛上你。黎明已經係絕佳例子,金句王由被恥笑到被崇拜,一星期嘅事咋。選舉講氣勢,8年前奧巴馬就係夠氣勢趕過希拉莉。希拉莉代表過氣,特朗普橫空而出,點夠佢鬥。香港都係,傳統主流,今年全部out晒。9月選舉,愈生口面,愈唔係傳統,愈係贏到開巷。」

「嘩,方帥,我咁生面口,將來有運行囉。」

沒有留言:

發佈留言