2016年5月13日 - 信報
「方帥，點睇魔童走去選立法會？」
「正呀，咁先有戲劇元素嘛。你睇吓Donald Trump就知，而家嘅政治選舉唔係睇政績，係睇知名度，出口術。舊派嘅，又話要從低做起，又話要講政治論述，又話要夠服務往績。呸！你睇？美國總統都唔使搵個有往績有論述嘅人嚟做，何況區區一個香港立法會議員？況且議員都冇乜嘢要做，最低要求只要你肯坐定定開會。唔怪得法律精英話立法會浪費生命，難得魔童唔介意浪費。」
「人哋肯為香港犧牲，值得讚賞啊，唔學似得我哋，只係識搵兩餐晏仔不問世事，不理社會死活。」
「對呀，有心有力有熱誠嘅人，我哋唔讚就算喇，千祈唔好潑冷水踩多腳，慌死人唔夠煩。例如班後生仔仆心仆命搞場台慶，一班老海鮮喺度口誅筆伐，極其兇殘。瑕不掩瑜，你幾耐冇試過三個半鐘頭乖乖地坐響度睇電視？你睇戲都冇咁嘅耐性，莫說電視。大台傾巢而出唔會甩轆嘅台慶，你唔可以忍受多十五分鐘。後生仔絞盡腦汁嘅山寨版，收貨有突。當你出口批評人哋之前，問吓自己，當日你相同年紀嘅時候，有冇本事做啲同樣嘅事情出嚟。」
「方帥，我毋須要識得反身翻騰三周半曲體，都可以批評人哋跳水靚定唔靚啩？」
「錯！有唔同。跳水可以有客觀標準，有冇水花，離台遠近，抱膝蹬腳，你唔識跳水都有合理理據去評價。做一件事，搞一場show，成敗與否，有主觀元素。黎明演唱會比起預期係算失敗，但最後結果反而贏到開巷，因為佢喺最大嘅客觀條件掣肘下做到最好。班後生仔何嘗唔係？做到大人老海鮮都做唔到嘅境界。寬容啲，畀條生路下一代行吓。」
「睇嚟方帥你好似好buy啲後生仔。」
「錯！呢個世界能者居之，勇者佔優。搞選舉同搞大show一樣，花時間嘥精神，如果仲唔係為咗金錢利益，仲可能分分鐘嘔突，你離遠見到都要立正畀個like。老海鮮例如我哋咁，冇晒氣力，大事不成，宜學習相沖生肖擰轉面，唔好阻住人為香港超度。」
沒有留言:
發佈留言